No tin klaridat si esaki ta konta pa Kòrsou tambe

WILLEMSTAD – Poko poko pero sigur e periodo di vakashon ta aserkando. Skolnan ta drentando den último luna i ku esaki vários ta esnan ku ta preparando nan plannan di vakashon. Tin ta hasi vakashon den nan mes pais, pero otronan lo biaha pa nos islanan bisiña, pa Europa òf pa Merka.
Pa esnan ku ta biaha pa Merka via di Miami ku American Airlines, entrante 15 di yüni e kompania di aviashon aki lo bai kuminsá kobra èkstra pa maleta, pa asina kontrarestá e subida drástiko den preis di petroli i ku esaki fuel di avion tambe.
Un servisio ku den pasado no tabata kosta pasaheronan nada, awor tin ku bai paga pa esaki. Ta trata di e medida ku American Airlines ta bai implementá kuminsando 15 di yüni próksimo, nèt promé ku e periodo drùk di zomer. Pa e promé maleta ku un pasahero trese pa ‘check in’ e mester paga 15 dollar i pa e di dos maleta 25 dollar. Mas ku tres maleta ta paga 100 dollar i seis òf mas maleta ta paga 200 dollar. Ekipahe ku ta bai na man no mester paga nada (ainda?).
American Airlines a tuma e medidanan drástiko aki, ku no a kai den muchu bon tera na Merka, komo pasonan pa keda viabel den e merkado instabil di aviashon. “Nos a haña nos fòrsá di tuma e medidanan aki pa motibu di un situashon ekstraordinario.”
Otro pasonan ku American Airlines lo tuma ta di kòrta e kantidat di buelonan doméstiko i kita vários mil empleado for di trabou.
Segun analistanan, preisnan di pasashi ta 20% mas karu kompará ku aña pasá. American Airlines a bisa, ku nan gastunan a subi ku 3 bion dollar for di kuminsamentu di aña, debí na e preis haltu di kombustibel.
“Nos ta konfrontá un periodo ekonómiko hopi difísil,” asina e Gerente di American Airlines, Gerard Arpey a bisa. “E industria no por sigui den e situashon aktual.”
E suma aki ku American Airlines ta kobra, ta promé biaha ku un kompania di aviashon grandi ta kobra pa chek in e promé maleta. Un servisio ku anteriormente tabata wòrdu kobrá den e preis di e pasashi. No ta kobra e suma aki pa miembronan di e klup di ‘frequent flier’ òf esnan ku ta pagando un preis kompleto di pasashi.
American Airlines anteriormente e luna aki a kuminsá kobra 25 dollar pa e di dos maleta ku wòrdu di ‘check in’ i tin kargonan mas pisá pa mas maleta adishonal. E kompania di aviashon a bisa tambe, ku nan lo bai kobra mas pa servisionan manera entre otro ayudo ku reservashon i atendé ku maletanan grandi.
“Nos ta trahando riba vários frontera pa trata kubri e gastunan di e oumento drástiko di kombustibel.”
Ekspertonan ta kere, ku e medida aki lo bai tin konsekuensia inmediato pa pasahero den forma di liñanan largu i retraso.
Liñanan di seguridat lo bira mas largu, ya ku pasaheronan lo trata di keda sin check in maleta pa bai ku esaki riba avion ku nan. Ora no tin mas lugá pa pone esakinan den avion, no ta keda nada otro di check in e maleta ku ta resultá den mas tardansa pa e buelo.
Aktualmente preis di kombustibel pa aviashon ta 80% mas karu ku e mesun periodo aki aña pasá. American Airlines a disidí tambe, ku nan lo retirá 85 avion modèl mas bieu ku ta gasta mas gasolin. Esaki ta kasi 10% di nan flota. For di aprel, American Airlines a subi nan preis di pasashi 14 biaha.
LA PRENSA a trata di drenta den kontakto ku Gerensia di American Airlines aki na Kòrsou, pero tabata enbano. Segun un relato den prensa merikano, e medida aki no ta konta pa buelonan pa eksterior. Asina ku LA PRENSA haña un klaridat riba esaki, nos ta informá nos lektornan.