BOGOTA, Colombia, - E senador opositor Piedad Córdoba, di kende hustisia colombiano lo investigá pa supuesto vínkulo ku gueria di FARC, a sigurá ayera nochi ku e no ta sinti temor p’e anunsio, i e lo sigui buska liberashon di e rehennan den poder di FARC.
“Mi no ta stòp ku mi trabou na fabor di e akuerdo humanitario. Lo mi spera ku serenidat investigashon di mi wes natural ku ta Korte Supremo di Hustisia. Mi ta sigui traha komo fasilitadó di e akuerdo, i mi no tin miedu di e investigashon”, Córdoba a señalá den un akto públiko na Cali (sùit).
Ayera, fiskal general Mario Iguarán a anunsiá ku lo kuminsá ku investigashonnan, despues di su bishita na Washington, i a papia riba lokenan a enkontrá den kòmpiuternan di number dos di FARC, Raúl Reyes, kende a muri durante atake di militarnan colombiano kontra su kampamentu situá na nort di Ecuador na luna di mart último.
“No ta straña mi ku despues di mi aktuashonnan na Kumbre di Pueblonan tené na Lima siman pasá, mi sa di e tipo di anunsionan aki”, Córdoba a enfatisá, ora el a kalifiká e anunsio komo “otro kortina di huma” pa skonde vínkulonan di polítikonan afektá pa Gobièrnu ku paramilitarnan di ultraderecha.
Senador Córdoba i Presidente venezolano Hugo Chávez a gestioná frente FARC, riba enkargo di Presidente di Colombia Alvaro Uribe, un plan pa logra liberashon di mas o ménos 39 rehen den poder di gueria di FARC, entre nan e dama polítiko colombiano-franses Ingrid Betancourt.
E mishon aki a keda interumpí na novèmber último den forma abrupto pa e Presidente colombiano.
Un relato di Interpol dia 15 di mei último a akreditá ku e archivonan enkontrá den kòmpiuternan di Reyes no a keda manipulá pa outoridatnan colombiano.