WILLEMSTAD – E karchi tabata bisa, ku 3or di atardi lo tabatin un konferensha di prensa relashoná ku e deliberashonnan estatal di e siman di ayera. A resultá sinembargo, ku e konferensha di prensa a tuma lugá 3or di mardugá, despues di un seshon di frustrashon konstante, palabranan duru i hasta menasa di bandoná mesa di negosashon. E promé frase pa prensa tabata: “Mòru, bon dia” komo ku ya kaba un dia nobo a habri. E deliberashonnan di ayera a pone hopi kòrda riba e deliberashonnan na Spaansche Hof ku a kaba den e famoso (segun otronan notorio) Slotverklaring na novèmber 2006. Ayera tabata mesun kos loke ta ilustrá komplisidat di e materia. Es mas, tin impreshon ku tur partido na mesa a balotá e deliberashonnan i tabata demasiado optimista. Despues di 15 ora sinembargo, huma blanku a sali for di e pipanan di International Trade Center, indikando ku a yega na un konsènsus. Un konsènsus un poko kompliká, ku mester di hopi espasio pa splika den e próksimo dianan.
Prinsipalmente Sint Maarten i su lider di delegashon Sarah Wescot-Williams a hunga un papel primordial den e deliberashonnan di ayera. Na diferente okashon sra. Wescot-Williams a pone preshon enorme riba e deliberashonnan i hasta a menasá di bandoná negosashonnan. Na un dado momentu sra. Wescot-Williams a bisa, ku mester laga e deliberashonnan pa loke nan ta i a sali for di sala, pero sekretario di Estado Ank Bijleveld, ku a hañ’é konfrontá ku un débakel serio di e negosashonnan, a bai su tras pa pidi’é rekonsiderá.
Algun di e puntonan importante ku a disidí riba dje ayera ta, ku e fecha di dia 15 di desèmber no ta alkansabel, manera LA PRENSA a informá for di ayera. A disidí, ku riba e dia ei ku lo ta Dia di Reino, lo tene un Konferensha di Mesa Rondó. Ounke ku e grupo di Direkshon Polítiko a pone riba papel ku posiblemente lo por alkansá promé di yanuari 2011, awor ta pushando pa wak si por alkansá prome di yanüari 2010. Punto importante ta, ku si no alkansá e fecha ei, lo mester tene elekshonnan nobo na yanüari 2010. Lo aserká Raad van State pa duna un konseho kon por enkaminá e proseso mas mihó, preferibelmente promé ku e fecha di promé di yanüari 2010. Otro punto ku a tene man ta e diskushonnan riba e ròl i tareanan di e Prokurador-General i tambe e punto di “bon gobernashon” ku Ulanda a insistí ku mester ta parti di e Lei di Supervishon Finansiero.
Te awe mèrdia ainda LA PRENSA no a haña e teksto final di e dokumento. Nos lo bin bèk riba diferente aspekto den nos próksimo edishonnan.