Skina di Sorti, awe djasabra 24 di mei di 2008, ta kuminsá ku deseá tur hende un bon dia. Pa supstansiá mi ponensia di ayera lo siguiente. Den oposishon PAR i PNP a pone e manera ku diferente nombramentu a tuma lugá un punto serio ku mester a atendé ku e urgensia nesesario. Entre tantu e asuntu a pèrdè importansia, pasobra ya no ta kestion di kiko ta bon òf malu, pero kestion di kiko ta polítikamente kunbiniente.
****
For di tempu ku honorabel miembronan di Konseho Insular a trata e asuntu di oumento di nan kondishon di trabou, mi a apuntá, ku den seno di koalishon tabata tin diferente miembro ku tabata spera i deseá ku un otro miembro di koalishon ku no ta nan, lo a yuda pasa e areglo. Na e okashon ei mi a hasi menshon di algu ku ta reflehá un mentalidat di gai bibu. Unu di trata di kue hende kabes abou, ku ta mal pero mal plamá den sektornan di komunidat.
****
Rondó di algun polítiko ku posishon klave den gobernashon tin hendenan ku a internalisá e filosofia ku Machiavelli ta prediká den su obra “The Prince”. Pues di krea e persepshon ku bo ta sirbi un interes mas ayá, miéntras loke bo ta hasi ta buska bo benefisio. Tuma bon nota ku mi ta skirbi “algun polítiko”, pues mas di un. No ta un fayo di pen, pero un formulashon konsiente, serio i duru. Mi ta bini bèk riba esaki na su debido tempu.
****
Pa lokual ta e situashon sosio ekonómiko di pais, mi ke duna gobernantenan den serio konsiderashon pa stòp di papia di un futuro alentador. Ku e desaroyo den preis di krudo i e falta di rekursonan ku nos ta disponé di dje (riba término korto) pa atendé ku e impakto dje desaroyo global, e klase sosial mas vulnerabel lo bira mas grandi. No mester trata di krea e persepshon falsu serka nan ku nan situashon ta bai mehorá.
****
Ta manera e chiste di hendenan, den skina di e bòksdó ku ta blo haña palisa di su oponente, ku kada bia ku e bòksdó yega skina ta bis’é ku e tin su kontrinkante dominá. Na sierto momentu el a puntra nan, ta kual ta esun anto ku ta gòlpi’é malamente ora ku gòng bati. Komunidat ta sinti kada dia ku nan poder di kompra a bai patras. Pa nan kos a bai di malu pa peor.
****
Ta bèrdat tambe ku diputado enkargá ku asuntunan sosial Humphrey Davelaar no tin arte ni parte den elementonan ku a kondusí na empeoramentu di e situashon. E lokual e polítiko aki a hasi ta, di kuminsá riba mal pia polítiko. Un fayo ku no ta eksepshon pero kolektivo. A faya na apresiá e situashon den su konteksto i gravedat real i konsekuentemente a faya den aserkamentu stratégiko.
****
Den e último reunion públiko, diputado Humphrey Davelaar su ponensianan enkuanto e impakto inevitabel di desaroyonan global tabata korekto. Pero komo polítiko e diputado mester komprondé ku e no por limitá su mes na un “droge verkondiging van feiten”. E tin di manda un “mea culpa, mea maxima culpa” pa lokual ta e apresiashon robes di e echonan na momentu di aseptá e puesto.
****
E tin di “come clean” pa e por haña espasio pa atendé ku e realidat di momentu sin e peso di e persepshon robes ku a keda krea na momentu di asumí enkargo di gobernashon. Komo polítiko ku e abilidat pa komuniká ku e masa, diputado Humphrey Davelaar mester buska foro popular pa splika e realidat i krea espasio pa un maneho ku pais por karga.
****
Ku e tipo di aserkamentu ei, e diputado ta evitá ku esnan ku ta malusá posishon polítiko pa benefisiá grupito (sea ta “bevriende relaties” òf famia i aliadonan polítiko) ta oumentá, miéntras esnan ku realmente tin bon intenshon, ta bira víktima di desepshon ku nan mes ta krea. Promesa inkumplí por lo general no ta konta ku komprenshon di elektorado. No ta pòrnada bo ta haña ku den paisnan ku kai den deterioro grave, mal maneho ta wòrdu rekompensá miéntras bon maneho ta keda kastigá.
****
Esnan ku kapasidat pa hiba un mihó maneho ketu bai ta faya na sigui e bon strategia ku ta deskribí den Biblia. Pa haña siguidónan Hesus a satisfasé nan promé nesesidat pa despues kombensé nan pa siguié den un “journey to higher goals”. E parti di Ponsio Pilato ku ta laba man i ta provoká ku e masa a skohe Barabas riba Kristu nos a splika ampliamente den otro kolumnanan.
****
Ora ku tin un situashon di “grote mate van ongelijkheid in inkomensverdeling“ bo no por gana e masa ku papiamentu, pero tin di drenta ku algun akshon konkreto ku ta aliviá por lo muy ménos inkomodidat di esnan mas vulnerabel. Ku otro palabra, bo tin di pone prioridat i krea espasio pa por realisá e akshon di satisfasé e inkomodidat di esnan mas vulnerabel. Bestuurscollege a faya den esaki i awor ku atversidat a dal aden e situashon ta bira difísil.
****
Un biaha mas, mi ke mustra ku e fayo general den polítika di Kòrsou ta ku no tin aserkamentu stratégiko. E bista ta di término korto (mester ta den gobièrnu mas lihé, ku mas tantu hende posibel) en bes di kontinuidat di partido i un aseptashon konsistente den komunidat. E aseptashon konsistente i mas amplio posibel, no nesesariamente ta wòrdu logra dor di ta “coute qui coute” den gobièrnu.
****
Pa bon di komunidat PAR i PNP mester wak ta kon nan ta pone un paro na e lokual nan sa ta “bestuurlijke ontsporingen”. E kosnan ei ta afektá PAR i PNP mas ku ámbos organisashon polítiko ta kere. E “onmacht” pa impaktá kalidat di gobernashon, al final lo bai kosta nan ku a krea e persepshon di ta bai drecha kos.
****
Spesialmente un partido grandi tin di komprondé, ku espektativa ta ku e tin impakto signifikativo. Naturalmente sierto espektativa ta irealístiko, pero ta un tendensia di reakshon komun ora ku elektorado den un forma masal sostené un organisashon komo alternativa riba lokual e ta konsiderá defisiente.
****
E aña aki, riba 30 di mei, lo por tin sendementu di un mecha di un revolushon polítiko pa medio di e denunsia ku miembro di frakshon di PVV, Hero Brinkman a keda di hasi. Mi ta fèrwagt un impakto devastador. Mi ta antisipá algu pió ku lokual a pasa den añanan 90. Mi ta insistí ku e dirigentenan polítiko ta hasi bon di tuma e kos masha, pero masha na serio mes.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te otro mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.