...Ku edishon britániko HELLO!...

INGLATERA, - E benta eksklusivo na revista HELLO! di e kasamentu di siman pasá djasabra, di Peter Phillips, nietu di Reina Elizabeth II, i e canadiense Autumn Kelly, djarason último tabata opheto di krítikanan fuerte na Inglatera.
Peter Phillips ta yu hòmber di prensès Anne i di kapitan Mark Phillips, i promé nietu di Reina Elizabeth II, ku a kaba di kasa siman pasá, i kende ta solamente e di diesun den linea pa subi trono.
Pero e benta eksklusivo di su kasamentu a pone, entre otro, e diputado liberal Norman Lamb, rabia masha tantu.
Segun Lamb, e loke ku a sosodé ta un “ekibokashon” ku por terminá hasi daño n’e monarkia.
“Pasobra esaki ta ‘disminuí’ e monarkia, segun wowonan di e siudadanonan. Si ke mantené e institushon i rèspèt di pueblo, tin ku evitá kombèrtí e monarkia den merkansia manera ora ta okurí ku e hendenan famoso di futbòl”, Lamb a bisa, sitá pa vespertino Evening Standard, ku den un editorial tambe ta kalifiká e loke ku a okurí komo “eror real”.
Den tèrminonan paresido e diputado laborista Ian Gibson a ekspresá, ku segun e, “e públiko britániko ta spera di e Reina ku e ta te ariba aya, i no ta ferwagt ku su pòtrèt ta sali publiká den HELLO! E Reina no ta esposa di un futbolista”.
Un funshonario di Palasio di Buckingham a bisa e vespertino ku un kos asina’ki lo tabata inimaginabel algun aña pasá, i a ekspresá su deseo ku e ta spera ku esaki lo no ripití mas.
Un mion dollar
Evening Standard ta kalkulá ku HELLO! a paga mas o ménos un mion dollar pa e benta eksklusivo di e kasamentu aki, ku ta okupá nada ménos ku 59 página di último edishon di e revista.
HELLO! ya a publiká un entrevista di 20 página ilustrá ku numeroso pòtrèt di e pareha promé ku kasamentu, i den e edishon nobo ta aparesé pòtrèt di e grupo di famia real durante resepshon na Frogmore House, den edifisio di kastio di Windsor.
Entre e numeroso pòtrètnan tin dies riba kua ta aparesé e propio Reina Elizabeth II, inkluyendo unu riba kua e ta mustra sonriente.
Tambe a publiká vários foto di frei di prens William i frei di prens Harry, Kate Middleton i Chelsy Davy, respektivamente.