WILLEMSTAD – “Antia ta duna hopi balor na e enkuentro tripartit di parlamentonan di Reino. Den pasado a keda proba ku e enkuentronan aki por ta di hopi balor i benefisio pa nos pais. Un ehèmpel konkreto di esaki ta e forma ku a atendé ku e benefishinan ku e deliberashonnan rondó di BRK tabatin pa nos”, asina Pedro Atacho, presidente di parlamentu antiano a duna di konosé.
Den e dianan ku a pasa i te ainda tabatin hopi diskushon relashoná ku e enkuentro parlamentario entre Antia, Aruba i Ulanda ku ta programá pa tuma lugá otro luna.
E enkuentro aki, ku a haña e nòmber di Parlementair Overleg Koninkrijksrelaties (POK) ta un plataforma ekselente pa diskutí asuntunan di interes mutuo. E enkuentronan aki a bin ta tuma lugá ku frekuensia i den forma eksitoso den e añanan tras di lomba, pero e aña aki a konosé un desaroyo ménos faborabel.
Aktuashon di un solo parlamentario ulandes, den e kaso aki Hero Brinkman di Partij voor de Vrijheid a okashoná un estorbo grave den e relashon parlamentario entre Antia i Ulanda.
Brinkman a kalifiká e islanan komo un “nèshi di ladron, un set di hende korupto” ku ta sigui parasitá riba Ulanda. Ora a pidié pa e hala su palabranan bèk, Brinkman a ninga di hasi esei, loke a pone ku e promé enkuentro di POK na kuminsamentu di e aña aki no por a sigui.
E di dos enkuentro ta na final di yüni awor. Parlamentu antiano a pone bon kla, ku e no ta bai aseptá ofensa di niun parlamentario ulandes mas i a pidi pa laga e mesun reglanan di komportashon ku ta konta pa reunionnan di Tweede Kamer, konta tambe pa e enkuentro di POK, algu ku parlamentu ulandes a bai di akuerdo kuné algun dia pasá.
Pero ainda tin e menasa ta kologá den aire, ku Brinkman lo por asumí e mesun aktitut, pasobra el a anunsiá kaba ku niun hende no por sera su boka. Esei mes a pone e pregunta surgi si ta nesesariamente Antia mester partisipá tòg na e enkuentro aki, aseptando humiashon di un parlamentario ulandes.
Mester bisa ku a instituí POK komo ku no ta eksistí un parlamentu riba nivel di Reino.
Pedro Atacho a bisa ku e ta konsiderá e enkuentro di POK importante i di hopi benefisio pa Antia. Ta hustamente den e enkuentro di POK aki.
A logra algun aña pasa ku Antia a haña un montante supstansial ku tabata resultado di e Belastingregeling Koninkrijk (BRK). Tabata esfuersonan di parlamentu antiano tambe, ku a kontribuí na esaki, segun Atacho a trese dilanti.
“Pa nos ta importante”, asina el a konkluí bisando, “pa mantené e kontakto parlamentario riba nivel di Reino pa asina por atendé asuntunan ku ta na benefisio di pais”.