WILLEMSTAD - Miembro di parlamentu pa frakshon di PAR, Marlon Jamaloodin ta kere, ku mester ta hopi kouteloso ku e forma ku ta atendé ku institutonan serio i di peso den nos komunidat. Den e kuadro ei, Jamaloodin ta haña ku mester wak diskushon rondó di MOT masha bon mes.
Miembro di frakshon di MAN ingeniero Dwigno Puriel resientemente a manda un karta pa minister di Finansa drs. Ersilia de Lannooy, den kua e ta puntra kiko ta pasando internamente na Meldpunt Ongebruikelijke Transacties, MOT. E informashon ku nos frakshon a haña ta indiká ku lo tin problemanan interno ku ta afektando funshonamentu tambe di e entidat aki, asina Puriel a splika den su karta.
MOT ta e sentro kaminda entidatnan finansiero por mèldu kualke transakshon straño i/òf dudoso ku nan haña nan konfrontá kuné. Si ántes MOT tabata dirigí spesífikamente riba banko i entidatnan finansiero so, awendia a keda probá, ku transakshonnan dudoso por tuma lugá na kualke establesimentu komersial.
Esei mes ta motibu ku resientemente minister di Finansa a anunsiá, ku ta intenshon di inkorporá mas establesimentu komersial den e lei aki. Un di e entidatnan ku – pa straño ku e por zona – no tabata kai bou di e lei aki ta kasinonan. Ta intenshon pa hinka nan tambe den e lei ku ta reglamentá funshonamentu di MOT.
MOT aktualmente ta bou di direkshon di Kenneth Dambruck.
Segun Dwigno Puriel, último tempu tabatin basta publikashon ku a duna e impreshon ku ke krea un imágen hopi positivo di MOT. Di otro banda, asina el a señalá, por a tende otro sonidonan ta sali, anto di hendenan ku ta hopi pega ku e organisashon.
Nos ke sa kiko ta kiko i p’esei nos ke un reunion ku komishon fiho di Finansa di parlamentu antiano, ta loke Puriel ta skibi den su karta.
Puriel ta mustra ku ta importante pa Staten ta na altura tur momentu kiko ta pasando den un entidat importante asin’aki.
No mester lubidá ku MOT Antia ta di vital importansia pa e reputashon i imágen ku sektor finansiero di nos pais tin riba plano internashonal, asina e ta sigui bisa.
MAN ta pidi tambe pa invitá minister di Finansa pa e ta presente durante e reunion aki pa diskutí funshonamentu i último desaroyonan na MOT.
MAN finalmente ta hasi un apelashon pa e reunion por tuma lugá mas lihé posibel, mirando importansia di e tema ku e frakshon ke e trata.
Por sierto ku resientemente Puriel a ekspresá su iritashon pa e hecho, ku for di dia ku el a pidi pa e reunion aki tuma lugá, ta parse ku parlamentu no ta weta e urgensia pa pone esaki riba agènda di reunion di Staten.
Nos por mira di e forma aki kon gobièrnu ta demostrá seriedat ku puntonan di vital importansha pa pais, Puriel a agregá.
Marlon Jamaloodin sinembargo ta kuestioná e importansia i seriedat di e asuntu aki.
Jamaloodin, a bisa ku e asuntu aki ta un asuntu delikado. MOT ta konosí komo un instituto ku tin informashon sensitivo ku no por divulgá sin mas. Anto den e lus ei mester evaluá bon, promé ku kuminsá diskutí riba e instituto aki den publisidat, el a bisa.
“E mesun kos”, segun e parlamentario, “ta konta pa otro institutonan manera Algemene Rekenkamer di Antia, SOAB i tambe e organisashon di siguridat estatal VNA.
Informashon delikado ku por afektá funshonamentu di e institutonan aki ta algu ku mester atendé ku e koutela nesesario”, Jamaloodin a bisa finalmente.