ORANJESTAD- E curso “CRUZA E BRUG SIN MIEDO” ta un curso sumamente valioso pa studiantenan haci e cambio grandi di scol basico pa scol secundario. E curso ta na promer lugar pa studiantenan di 6de klas.
Sinembargo tur aña tin studiantenan di 5de klas cu ta participa pa nan por cuminsa practica den 6de klas con nan mester studia pa ta super bon prepara ora yega e momento pa bai di 6de klas pa Ciclo Basico.
Den e siguiente parti nos lo papia tocante e balornan di e curso pa e studiantenan.
E curso “CRUZA E BRUG SIN MIEDO” ta consisti di e siguiente temanan of capitulonan:
Introduccion
Crea un Actitud Mental Positivo
Cruza e Brug (Di Scol Basico pa Ciclo Basico)
“Mind Mapping”
Motivacion pa Studia
Concentracion
Con Sigui Les
Studieplanning & Time-Management
Clausura y Evaluacion
Algun di e puntonan na cual cu hopi atencion ta wordo dedica na dje ta:
prepara e studiante den un ambiente agradable, trankil, expresivo pa e bira conciente di e diferente puntonan cu e mester tene cuenta cun’e ora e drenta e prome aña di Ciclo Basico
traha cu un optimismo pedagogico continuo caminda cu e studiante ta siña pa
kere mucho mas den su potencial y su inteligencia
aumenta su self-esteem (autoestima)
crea e confianza necesario pa e por tin e mayor exito posibel den Ciclo Basico
kita e miedo existente pa e scol nobo, e diferente maestronan/maestranan nobo, vaknan nobo (por ehempel wiskunde, ASW, N & T etc.), e sistema di duna les, e cantidad di studiantenan, studiantenan (mas) grandi na e scol, e “peer-pressure” etc.
mustra cu e optimismo y e positivismo ta constantemente presente pa guia, apoya y sostene tur studiante na e mihor forma posibel den tur nan actividad na e scol nobo;
siña e studiante “con pa studia” y mustre hopi cla, pa medio di diferente figuranan, schemanan y ideanan concreto e forma den cual e por usa tur e strategianan akinan pa asina e por bira e mihor studiante posibel y haya e miho puntanan tambe pa su proefwerknan / C.P. of cualkier otro forma di un test.
E curso tin un duracion di 20 ora y lo tuma lugar durante diferente periodo den e luna di juni, juli y augustus 2008.
Lo tin un anochi di informacion riba diaranson 4 di juni 2008.
Lugar : Colegio Arubano – local T7 (entrada di Colegio bai na man robes)
Ora : 7:00 – 8:00 pm
Docente : drs. Rudolf R. Kelly