HENGELO - Despues di a gana e kompetensia ku e tim di relevo na Puerto Rico, Churandy Martina a biaha pa Ulanda, pa defendé su título na e FBK Games (Hengelo).
Djasabra 24 di mei e atleta olímpiko, Churandy Martina, a kore e kompetensia aki, kaminda el a mustra mundu ku ketu bai e ta den e tòp internashonal di Atletismo.
El a logra di gana e distansia di 200m ku un tempu formidabel di 20.50 sec, ku un kontra bientu di kasi 2m/s.
Churandy Martina for di komienso di dia tabata hopi trankil i bo no por a bisa esei di e otro atletanan. Su kontrinkantenan tabata kana bai bini den hotèl i nan tabata mustra nervioso durante di kalentamentu, miéntras ku Martina tabata hari ora ku kámara bin riba dje. E tabata sa ku e ta den bon kondishon pa gana.
E ganadó di 800m huntu ku e organisadó di FBK Games, Ellen van Lange a bisa dilanti di kámaranan di Fisheye Media Productions ku danki na Arkefly por a bini Ulanda na último momento, ku Churandy Martina ta e gran faborito i ku e ta kontentu ku el a skohé pa kompetí aki na Hengelo.
El a bisa, ku e stadion lo bira loko si Martina mester gana.
Churandy Martina no a haña ni chèns pa kore su buèlta di honor. Tur kaminda e mester a para pa duna firma i saka pòtrèt kaminda e taabta hasi esaki ku un sonrisa riba su kara.
E kompetensia tabata dediká na e sra. Fanny Blankers-Koen, mama di dos yu, ku a logra di gana 4 medaya di oro na e Weganan Olímpiko di London 1984.
Kasi dies aña pasá na 1999 e “Flying Housewife” aki a wòrdu titulá tambe e “Atleta di Siglo” huntu ku Carl Lewis.
Churandy su próksimo kompetensia ta e Golden Leauge di Berlin, Alemania, djadumingu 1 di yüni 2008. Minister Leeflang a supsidiá e programa di Churandy, kaminda awor e por wòrdu kompañá pa ku su entrenadó Wendell Prince.