WILLEMSTAD - Pa desèmber 2008, Refineria Isla mester kumpli ku eksigensianan ku ta para den su pèrmitnan pa loke ta limitashon di polushon di Kòrsou. No tin diskushon: gobièrnu di Kòrsou mester sòru pa esei, asina sekretario di Estado enkargá ku Relashon den Reino Ank Bijleveld a bisa despues di a firma e protokòl pa ehekushon di e Inisiativa Sosial Ekonómiko (SEI) djabièrnè último.
Tal manera nos a informá kaba, tin 237 mion florin disponibel pa 118 proyekto. Di e montante aki, Ulanda a pone 60.6 mion. Un dje proyektonan ku durante firmamentu di e protokòl, Bijleveld a enfatisá riba dje ta e provishonnan ku a pone den e trayekto di SEI pa atendé ku e problemátika di Refineria Isla. “Ami mes a insistí riba esaki”, segun Bijleveld.
“Mi ta haña ta importante pa atendé e problemanan ekonómiko, sosial i finansiero di e isla. Ulanda ke invertí den e pais nobo. Mester weta e akuerdo komo un maneho ku ta sostené e desaroyo nobo. SEI ta un trayekto ku ta pertenesé na e trayekto estatal i den esaki e problemanan di Refineria Isla mester haña atenshon,” sekretario di Estado Bijleveld a bisa.
Bijleveld a bisa, ku e ta kontentu ku tin un aspekto di vital importansia ku a hinka den e trayekto di SEI, ku ta e problemátika di Refineria Isla. Riba tèrmino kòrtiku e refineria mester kumpli ku normanan ku ta limitá polushon di nos isla, segun e mandatario.
El a mustra, ku kada kuartal lo mester midi polushon di awa i tera rondó di e refineria. Pa por kumpra e aparatonan adekuá pa esaki, a reservá un montante di mei mion florin den kuadro di SEI.
“Mi ta kere ku a yega momentu awor si, pa pone Refineria Isla kumpli ku lei, el a bisa enfátikamente. Anto den esei, Bestuurscollege ta esun responsabel, “ segun e sekretario di Estado den entrevista ku koresponsal di Radio Nederland Wereldomroep, Miriam Sluis.
El a bisa, ku no ta pòrnada a inkluí e asuntu aki den SEI.
“Nos no ta papiando ainda mes di reglanan internashonal ku un kompania manera Refineria Isla mester kumpli kuné. Nos ta papiando simplemente di e stipulashonnan ku ta para den e Pèrmit di Molèster ku e empresa tin su poder. E mester kumpli”, Bijleveld a ripití.
Riba e pregunta insistente di Sluis kiko lo pasa den un kaso hipotétiko ku e refineria no kumpli, Bijleveld a bisa ku tin sanshon den kuadro di Reino ku por apliká.
“Pero mi no ke pensa ni dje leu ei. Nos a yega na palabrashon hopi kla i hopi konkreto ku gobièrnu di Kòrsou riba e materia aki. Bestuurscollege ta karga e responsabilidat pa esaki,” segun e mandatario ulandes.
Puntrá pa un reakshon riba e ponensha aki di Bijleveld, presidente di Fundashon Kuido Humano Norbert George a ekspresá su dudanan den palabranan di e mandatario ulandes.
“Nos ta konsiderá ku si unabes tin regla kaba na kiko Refineria Isla mester atené su mes, ku no tin kuestion di warda mas. Simplemente mester ehekutá e kos mes mesora,” el a bisa.
“Pero aki seis luna no ta dje leu ei tòg?” ta loke Sluis a puntr’é.
“Bai splika famia di e 18 hendenan ku tur aña ta muri den forma prematuro pa motibu di polushon esei,” Norbert George a deklará.