WILLEMSTAD - Parlamentu di tantu Antia komo Aruba ta hopi preokupá pa e ambiente di rasismo kresiente ku ta reinando na Ulanda kontra antiano i arubiano.
Parlamentu ei Antia i Aruba ta rechasá tambe e forma ku Ulanda a bin ta atendé ku antiano i rubiano.
E preokupashon aki a bin dilanti durante e enkuentro bipartit entre parlamento di Aruba i esun di Antia siman pasá.
Manera ta konosí, parlamentu di Aruba i di Antia a reuní siman pasá na St. Maarten den un kumbre bipartit pa diskutí un kantidat di punto.
Entre e puntonan aki tabatin tambe e prekupashon ku ta reina ku atraves di vários medida i akshon, Ulanda ta tumando un aktitut ku pa Antia i Aruba ta inaseptabel.
Na kuminsamentu di yüni awor, e dos parlamentonan aki lo reuní ku un delegashon parlamentario ulandes.
E intenshon ta, pa durante e enkuentro aki ku e delegashon ulandes, pone Ulanda na altura di e preokupashon aki ku ta reina.
Pero for di awor, e respektivo parlamentonan di Antia i di Aruba a tuma posishon den esaki. Nos ta rechasá e aktitut di Ulanda i “medidanan diskriminatorio” enérgikamente, asina e dos parlamentonan ta bisa.
Un dje puntonan konkreto ku Antia i Aruba tin hopi problema kuné, ta introdukshon di e asina yamá “Verwijsindex Antillianen”, konosí tambe komo VIA.
Mester bisa ku e VIA a subi mesa, despues ku tabatin intentonan den pasado pa eks minister Rita Verdonk pa introdusí e lei ku ta permití Ulanda manda tur hóben antiano problemátiko bèk Antia.
Antia a bringa e intenshon aki ku éksito, pero atraves di “porta di kushina”, Ulanda ta tratando tòg pa logra haña gara riba moveshon di antianonan na Ulanda.
Antia ta haña e medida aki simplemente innesesario, e parlamentonan a konkluí. Ta konosí, ku un dje parlamentarionan ku ta fuertemente kontra di e aktitut di Ulanda, sigur tambe kontra introdukshon di e VIA, ta parlamentario Eunice Eisden di frakshon di MAN.
Eisden a referí tambe na e rapòrt ECRI, e rapòrt di Komishon Oropeo kontra Rasismo i Intoleransha, rapòrt ku a keda publiká e aña aki.
Den e rapòrt aki e komishon ta rekomendá Ulanda pa kambia su aktitut ante e forma ku el a bin ta atendé ku antiano i arubiano.
Eunice Eisden a bisa, ku durante e enkuentro ku e delegashon parlamentario ulandes, parlamentu antiano tin gana tambe di topa ku e Komishon Oropeo, pasobra aparentemente, asina el a konkluí, maneho di gobièrnu no ta dirigí riba integrashon, pero mas bien riba pinta e parti aki di poblashon di Reino pretu. Anto esaki nos ta kontra di dje, el a agregá.