Aruba por comparti experiencia di Israel cu energia alternativa

ORANJESTAD - Lider di AVP, mr. Mike Eman y parlamentario Mike de Meza den presencia di funcionario di Departamento di Relacionnan Exterior, drs. Paul Croes, a sostene un dialogo importante cu e Embahador di Israel estaciona na Caracas, Venezuela riba e aplicacion di energia alternativa na Israel.
Embahador di Israel, Shlomo Cohen, tabata di bishita na Aruba den coneccion cu un celebracion special na Aruba pa e di 60 aniversario di e nacion Israel.
Israel ta hunga un papel importante den e desaroyo di energia alternativa. Di vehiculo electrico pa energía solar Israel ta un pionero riba tereno di technologia nobo.
Israel ta tumando un delantera den una serie de tereno di energia alternativa destina pa reduci emision di CO2 y pa impulsa e uso di energia renovable.
Israel ta un di e promer paisnan den promove activamente uso di vehiculo electronico di cero emision y pa prepara e infrastructura pa e mercadeo masivo di tipo di vehiculonan asina.
Israel y Estados Unidos a inicia un programa di investigacion conjunto riba energia alternativa.
E proyecto conjunto americano-israeli di investigacion energetica lo inverti 20 miyon dollar pa anja den investigacion na Israel pa sigui desaroya y cultiva fuentenan di energia renovable y alternativa.
E empresanan di investigacion conjunto lo concentra riba energia solar, biomasa, eolica, geotermica, biento y den tecnologia avanza di bateria y eficiencia di energia.
Como cu partido AVP a traha un Plan Energia y ta desaroyando e concepto di aplicacion di energia alternativa na Aruba, e partido ta mira tambe un oportunidad pa Aruba den e hemisferio aki por ta un centro di investigacion y di desaroyo di energia alternativa, specialmente riba e tereno di solo y biento. Mescos cu Merca ta financia e plan di research y desaroyo aki na Israel partido AVP ta mira cu Union Europeo por ta interesa pa financia un desaroyo asina na Aruba.
Pesey e lider di AVP, mr. Mike Eman y parlamentario Mike de Meza tabata gradicido pa e informacion cu Embahador Cohen a duna nan y tambe e oferta pa comparti nan experticio riba e tereno aki cu Aruba. Tambe, pa locual ta plantacion den areanan seco, Israel a desaroya hopi conocemento cu e ta pone na disposicion di Aruba.
Lider di AVP, mr. Mike Eman a atende tambe e celebracion pa e 60 aniversario di Israel como huesped special di Embahador Shlomo Cohen y a expresa palabranan di hopi pabien na e nacion Israel y comunidad hudieuw na Aruba.
E Embahador tabata gradicido pa e atencion y ambiente di hermandad experiencia na Aruba.