AMSTERDAM/WILLEMSTAD - Mas i mas outomobilista ku tin un vehíkulo di diesel, ta usando zeta dushi den nan tanki. Tin ta us’é den kombinashon ku diesel, tin ta us’é puru. Konsekuensia ta, ku zeta dushi ta bendiendo manera pan kayente!
E motibu ta mas ku lógiko: dia pa dia ta birando mas difísil pa kumpra kombustibel normal pa un vehíkulo. Un komparashon: diesel awor aki ta kosta 1.30 euro pa liter, miéntras ku e zeta dushi menshoná ta apénas 79 sèn pa liter.
Segun medionan di prensa ta informá na Ulanda, komo konsekuensia di e hecho ku preis di diesel a subi drástikamente den e aña ku a pasa, zeta dushi a bira un alternativa interesante.
Ofisialmente esaki no tin mag, pasobra no mester lubidá ku di kada liter di kombustibel ku e outomobilista kumpra, un parti ta bai pa gobièrnu den forma di akseins. Pero den práktika, no tin kòntròl tòg si un hende ta kumpra diesel i kombiná esaki ku otro kos.
Un ehèmpel: un hende ku un outo Mercedes Benz bieu ku ke bai Bordeaux pa fakansi, ta spar 65 euro. Un bon boká den e tempu djawor aki, segun e korant De Pers.
Un outomobilista a bisa ku a kost’é tres kuart’ i ora pa e por a basha tur e bòternan di zeta dushi den su tanki. Pero si mi wak kuantu sèn mi ta spar, mi ta kere ku e ta bale la pena, asina el a bisa.
Hecho ta, ku tin sierto kondishonnan pa e outo por funshoná asin’aki.
Pa kuminsá, e vehíkulo mester tin un motor ku un pòmp di zeta fuerte, pasobra e zeta ta mas diki ku e diesel.
Ta rekomendabel no usa e zeta dushi so, pero kombiná ku diesel. Banda di esei, ta rekomendabel tambe pa kambia bo zeta i filternan ku mas frekuensia.
Zeta dushi mester ta mas kayente ku diesel. Esei ta nifiká pa outomobilistanan na Oropa, ku nan no por kore kuné den invierno.
Un eksperto den asuntu di outo a bisa, di otro banda ku e ta rekomendá pa no kore ku zeta dushi. “Kalidat di e zeta dushi no semper ta mesun kos. Ademas, no ta tur sistema di motor ta bon pa usa e zeta aki.“E ta keda un kos ku sierto riesgo”, el a bisa.
Pero, ta parse ku e asuntu aki ta ganando popularidat ketu bai na Ulanda........