WILLEMSTAD – Polis no ta alkansando e kantidat di 1000 prosèsverbal pa luna ku Ministerio Públiko ta propagá. Durante e promé sinku lunanan di e aña akí, polisnan a parti un kantidat di 3770 prosèsverbal, loke ta un promedio di 750 pa luna. E 3770 prosèsverbalnan akí ta representá un montante di 282.750 florin, saliendo for di e averahe di 75 florin pa but/ transakshon.
Na ougùstùs 2006 Ministerio Públiko a informá den un relato ku nan a publiká, ku e no ta sinta ketu i ku e ta sigui ku akshon di kòntròl den tráfiko i di parti 1000 prosèsverbal pa luna. Mas aleu Ministerio Públiko a informá na e okashon ei ku, saliendo for di e averahe di 75 florin pa but/transakshon pa kada prosèsverbal, ta yega na un kalkulashon di un montante di alrededor di 900 mil florin ku mester a kobra den 2006. Sin embargo, kasi 3 aña despues polis ta trahando un promedio di 750 prosèsverbal pa luna i no ta konosí kuantu di e prosèsverbalnan Ministerio Públiko ta kobrando.
E kantidat di prosèsverbalnan trahá e aña akí, segun e relatonan ku polis mes ta manda, a suma un total di 3770. Fin di luna awor 2008 ta konta 150 dia, loke ta nifiká ku polis a parti un promedio di apénas 25 prosèsverbal pa dia. Esaki sigur ta un indikashon dikon no ta alkansando e 1000 prosèsverbalnan pa luna ku Ministerio Públiko a menshoná. E echo ku polis no ta alkansando e kantidat, ta remarkabel si mira kuantu infrakshon di tráfiko tin tur dia. Den práktika polis por traha sigur 1000 prosèsverbal pa dia, pa pasamentu den lus kòrá so! LA PRENSA a informá anteriormente kaba di un konteo ku SOAB a hasi na 2002 i ku a resultá den un promedio di 90 outo ku a pasa den lus kòrá den 1 ora na un lus di tráfiko. Kòrsou tin 48 lus di tráfiko.
E prosèsverbalnan ku polis a parti e aña akí ta pa: korementu sin faha di seguridat (1500), diferente papel di outo ku no ta na òrdu (575), korementu sin reibeweis (500), diferente infrakshon no spesifiká (318), vehíkulo sin seguro (225), vehíkulo no di kùr (144), papia na telefòn selular sin ‘handfreeset’ (120), kore den direkshon kontrali (89), pasamentu den lus kòrá (55), vehíkulo sin impuesto pagá (43), kore sin faha di seguridat bistí i sin papelnan di vehíkulo (31), stashoná na un sitio prohibí (23), vehíkulo sin papel di kùr i sin impuesto pagá (11), keda sin saka indikadó (10), karga ku tabata mal mará (2) i vehíkulo ku mòfler kibrá (1). Durante e kòntròlnan polis a kita 27 vehíkulo for di riba kaminda i hiba nan Kurá di RASPA.

Ulanda

Entretantu e resultadonan di un investigashon na Ulanda a indiká, ku kòntròlnan di tráfiko a kontribuí na e bahada di víktimanan di tráfiko durante último añanan. E investigashon tabata un inisiativa di e akademia di polis na Ulanda. E timnan di kòntròl di tráfiko VHT (verkeershandhavingsteams) ku Ministerio Públiko a instituí 9 aña pasá, tabata pa fortifiká e kòntròl di tráfiko ku ya tabata tuma lugá dor di polis en general. Ku introdukshon di e timnan akí, e atenshon pa infrakshonnan di tráfiko a baha serka demas polisnan.
E timnan akí ta konsentrá nan mes riba e infrakshonnan di tráfiko ku ta kousa mayoria víktima: stür bou di influensia di alkohòl, bistimentu di faha di seguridat i hèlmu di protekshon, ekseso di velosidat i pasamentu den lus kòrá. Segun e investigadónan, e trabou di e timnan no a keda sin haña atenshon di públiko. Den mayoria kaso nan ta haña apresio.