Lorito ta yama tur hende un felis djamars. Nos ta trata di skibi awe ku un zonidu konstante riba nos kabes. Un hende a subi dak i ta nèt riba nos kabes. Si e Lorito keda na mitar awe bo sa ta di kon!
*********
Den e trabou di prensa ta masha importante ku ta komentá asuntunan, pero den un konteksto korekto. LA PRENSA a publiká ampliamente ayera tokante e kontroversial intento di destaho públiko ku ke òf ta hasiendo den e kaso di SEI. Nos ta bisa “intento”, komo ku ainda e kaso no a kristalisá. Tur dokumento ta mustra ku e intenshon tabat’ei. Si e ta sigui, ta un di dos pregunta.
*********
Nos pregunta ta esaki: kon un partido ku ta para pa bon gobernashon i transparensia por pèrmití ku algu asina aki ta tuma lugá? Pa nos, ta parse ku e partido a pèrdè su konteksto di funshoná, si un mandatario por pensa di pasa un “fastball” (tambe na nòmber di un otro mandatario) i kere ku hende mester guli e kos aki. Por bin bisa kuantu ku ke awor aki ku no a tuma desishon ainda, pero e mero hecho ku e intento tabat’ei sigur ta masha kuestionabel.
*********
Nos a skucha un komentarista awe mainta ku a bisa, ku un hende mes mester por disidí si e ta skohe un fèrfdó pa 20 mil florin òf un pa 15 mil florin. Nos ta kere ku tur rèspèt pa su punto di bista ku el a pèrdè e punto. E punto no ta sa kuantu bo ta gasta komo hende privá. Esei ta bo asuntu! Ora ta asuntunan kolektivo (di gobièrnu i ku ta toka e pagadó di belasting) tin un otro aserkamentu. Ta plaka di pueblo! Ademas ta for di presupuesto di Kòrsou ta bai pag’é!
*********
Nos no ta gusta e idea tampoko ku kada bes ku sierto partido (nan) hasi un kos robes, tin medionan ta kore defendé nan. Ora kos ta robes, e ta robes bou di tur sirkunstansia! Manera ulandesnan ta bisa masha bon mes: tin kos ku maske kuantu bo bir’é òf bòlt’e no ta “goed te praten”.
*********
Nos a gosa masha e bunita edifisio ku polis a haña na Montaña. Bunita seremonia, hopi hende a mustra kara, palomba a bula hera dal den Lorito, tur ta oké. Nos pregunta ta esaki: tantu bal bo tin un edifisio nobo i e servisio ta pésimo! A bira tempu pa kuminsá dediká atenshon tambe na e parti di kontenido di trabou. Infrastruktura i medionan pa traha ta bon, pero sin e aktitut korekto nos a keda mesun leu!
*********
Nos a mira masha polis ta “pose” pa pòtrèt. Nos ta komprondé, ku ta polisnan pa traha na e Warda aki. Nos a mira 9 polis riba e pòtrèt pa sirbi Montaña. Nos ta spera ku anochi i mardugá tambe tin hende pa sirbi. Ta esei komunidat kier mira di su polisnan! Nos tin masha konfiansa den inspektor Hazelhoef ku ta parse nos un hende ku tin trabou di polis den su ardunan. Ban wak si e por trese e kambionan i kontribuí na un polis pa komunidat (legumai e asuntu di polis di bario!).
*********
Nos ta pendiente pa su ki Korte ta disidí den e kaso di dòkternan di kas. Nèt awe Lorito kier a dal un AO, pero no tabatin dòkter. Nos lo informá bo asina ku nos tin mas detaye. Keda pendiente!
*********
Nos kier a manda un saludo pa Doña Magaly ku a kumpli aña ayera. Un saludo tambe pa nos amigu kolumnista Ricardo ku ta bèk despues di ousensia kòrtiku. Nos a sinti falta di e kolumna! Kòrda riba nos e-email na loritotabula@yahoo.com Te mañan ku Dios su poder!