WILLEMSTAD – “Si tin krítika riba polis, ta pasobra polis ta traha. Laga e krítika aki ta un estímulo pa boso sigui hasi boso trabou”. Esei básikamente tabata mensahe di tantu gezaghèber di Kòrsou, mr. Lizanne Dindial komo minister di Hustisia di Antia David Dick ayera tardi.
Ayera, tabatin apertura ofisial di e warda di polis na Montaña.
Mester bisa ku e edifisio nobo – por sierto hopi bunita – a remplasá un edifisio bieu ku tabata den un estado di dekadensia formal.
E warda di polis nobo ya tin algun luna den uso, pero ayera tabatin e apertura ofisial, den presensia di un kantidat grandi di invitado.
Gezaghèber Lisa Dindial a para ketu na último desaroyonan rondó di Kuerpo Polisial.
E promé mandatario di Kòrsou tabatin hopi elogio pa e manera ku minister Dick a logra drecha alohamentu di polis di Montaña. Hopi biaha no ta solamente asuntu di sèn, pero tambe e brio, e kreatividat i e determinashon pa hasi un kos ta importante, el a bisa.
Por sierto ku no ta Montaña so a keda kla: manera ta konosí, e warda di polis bieu na Rio Canario tambe a pasa den un metamorfósis kompleto i awor akí ta brinda alohamentu adekuá na polis den e área aki.
Nos tur sa, ku tin hopi reklamo riba komportashon di polis. Ta un hecho di otro banda ku kaminda hende ta traha, por tin kos ku ta bai ménos bon. Punto ta, ku esaki no mester keda na krítika. Hustamente e krítika aki mester sirbi pa yuda polis mehorá su prestashon, segun e promé mandatario di Kòrsou.
“Nos ke mira un Kuerpo Polisial ku ta funshoná den forma ekselente.
Nos ke un agente polisial ku ora surgi un problema, su adrenalina ta subi i e ta ansioso pa solushoná e problema aki. Esei ta un dje karakterístikanan di un bon polis,” Lisa Dindial a bisa.
El a bisa ku e polis mester realisá un kos masha importante: polis t’ei pa sirbi e komunidat den kua e ta biba.
Minister di Hustisia i David Dick a konfirmá e pensamentu aki.
E tambe a mustra ku krítika riba polis mester sirbi un meta, anto esei ta pa drecha e propio kuerpo.
Un Kuerpo Polisial por sierto mester tin tres elemento pa e por funshoná bon. Personal mester ta bon prepará, mester tin e medionan finansiero nesesario anto mester tin un bon alohamentu.
Mi ta hopi kontentu ku awe nos por ta para dilanti un edifisio nobo pa polis di Bándariba, el a bisa.
David Dick a mustra sinembargo, ku e otro dos elementonan ta mes importante. Pa polis por funshoná bon, e mester ta bon prepará.
Pa polis por hasi su trabou manera mester ta, e mester tin e hèrmèntnan nesesario, o sea, mester tin e medionan pa invertí den esakinan tambe, segun minister Dick, kende finalmente a hasi un apelashon riba Kuerpo Polisial pa no laga krítika desanimá nan, pero pa konsiderá esaki un método pa drecha su funshonamentu.