ORANJESTAD - Directiva di CAPA ta informa tur su socionan cu su Reunion General anual di 2008 ta tuma lugar awe diaranzon 28 mei 2008 pa 7.30 di anochi. E lugar ta sede di SEPPA na Hato.
E dianan aki tur socio a ricibi tur informacion cu relatonan pa e reunion General di 2008. E miembronan di CAPA, kendenan no a ricibi su revista cu e diferente informacionnan personal por pasa na oficina di SEPPA, na HATO of yama Telnr 583.8859 y puntra pa un dirigente di CAPA.
Esnan cu a ricibi e informacionnan, por ripara e cambio, cu CAPA ta pasando aden. E revista tin hopi informacion di nos cooperativa, con e situacion ta actualmente, nos problemanan, con CAPA a crece e ultimo añanan y hopi mas.
Un biaha mas directiva di CAPA ta notifica tur socio cu nan presencia na e Reunion General di diaranzon awor, dia 28 mei 2008, ta altamente aprecia, ya cu cada punto di agenda ta di sumo importancia, pero mas importante ta cu esnan presente lo ta parti di e decisionnan cu lo cay durante e reunion aki.
E punto clave cu conhuntamente nos mester bay tuma un decision ariba dje, ta e reparticion di ganashi, cual a ser alcanza durante 2007. Directiva di CAPA lo trece un proposicion al respecto pa discuti y despues pasa esaki pa aprobacion di Reunion General, esaki di acuerdo cu nos statutonan.
Directiva CAPA, ademas di duna tur informacion, lo purba di contesta tur pregunta di socionan na e mihor forma. Sugerencianan pa mihoracion di nos organización tambe ta bonbini e anochi aki. P’esey na e reunion di 28 mei 2008, Directiva di CAPA ta spera un asistencia grandi di su miembronan cual ta esencial pa nos cooperativa por sigui haci su trabao manera debe ser. Un asistencia grandi lo duna e Directiva un sosten grandi pa e por sigui haci su trabaonan na bienestar di miembrecia di CAPA.
Cooperativismo tur caminda di mundo ta un instrumento di poder economico pa e clase trahador. Cooperativismo ta ser yama tambe e desaroyo economico husto y democratico pa motibo cu tur miembro ta igual y semper e meta ta uno husto, social y solidario. Esaki ta un lucha di nos tur cu ta socio di CAPA.
Nos ta bibando den un mundo globalisador, unda e politica economico ta pa e grandinan y riconan tin tur di bisa y den cual e desaroyo economico no ta uno husto y equitativo.
Ta e desaroyo economico aki ta den un lucha fuerte contra organisacionnan social cu un filosofia di solidaridad di un pa otro. E consecuencia ta cu dia pa dia tin menos cooperativanan na mundo y ta e concepto Neo-liberal ta dicta tur desaroyo pa caba cu cooperativismo.
P’esey un apelación na tur miembro di SEPPA cu ainda no ta miembro di CAPA, pa afilia na CAPA. E bentahanan ta grandi y ademas nos tur hunto ta coopera cu otro solidariamente, pa haci CAPA un cooperativa grandi, como parti di un desaroyo economico husto y democratico na defensa di e clase trahador.