WILLEMSTAD - Minister di Tráfiko i Komunikashon, Maurice Adriaens ta haña masha remarkabel ku UTS no ta ofresé e rebaho di tarifa di Internèt na tur su klientenan. E klientenan ku tin un kontrakt kaba, su tarifa ta wòrdu redusí solamente si nan firma un kontrakt nobo.
UTS a informá minister Adriaens, ku e no ta haña nesesario pa duna un splikashon di e tarifanan fiho riba e tráfiko di telefòn.
Segun Adriaens, e diskushon tokante di e kontrakt ta un diskushon hurídiko. UTS a bisa e minister, ku ora ku e tin kontrakt ku un kliente, no ta sin mas UTS por redusí e tarifa. Esaki, pasobra kisas tòg e kliente ta deseá na mantené e tarifa karu. Ta p’esei e kliente mes mester bisa UTS ku e ta deseá di haña e tarifa barata. No ta posibel pa UTS duna e kliente e tarifa barata outomátikamente.
Pa minister Adriaens, esaki ta situashon un poko straño. “Pero kisas hudisialmente nan tin rason”, asina Adriaens a remarká.
Di tur manera e punto di bista di UTS ta, ku tur hende ku tin un kontrakt nobo òf ta bai haña un kontrakt nobo, den kaso ku e ta deseá por haña e tarifa nobo.
Pa solushoná e diskrepansia aki, minister Adriaens ta opiná ku tin diferente posibilidat. “Mi a hasi mi sugerensianan na UTS i mi ta spera ku nan a tene kuenta ku nan”.
Riba e pregunta si UTS a kontestá e minister kaba riba e pregunta dikon e ‘tarifanan fiho’, mester bira mas karu, Adriaens a kontestá ku nò. ‘UTS ta argumentá ku esei no ta nesesario, pero esei ta nan opinion’. Adriaens a remarká ku segun Raad, ku e mester duna e splikashon. Ta p’esei e minister a palabrá ku UTS, ku ora ku e direktor, Paul de Geus regresá Kòrsou, ku tan pronto posibel lo sinta na mesa ku Büró Telecommunicatie i Post, pa duna un klaridat riba e struktura di e gastunan di UTS. Despues di e enkuentro ei, un desishon definitivo por kai, enkuanto oumento di e tarifanan, Adriaens a indiká.