WILLEMSTAD – Den fin di siman, e direktor general di Krus Kòrá di Ulanda, Kees Breedeveld, den fin di siman tabata na Kòrsou, relashoná ku un reorganisashon grandi ku ta pendiente pa tuma lugá na Ulanda. Krus Kòrá di Antia i Aruba, ta forma parti di e di Krus Kòrá di Ulanda. Por spera ku e situashon aki lo keda mantené, despues ku e kambionan struktural wòrdu konkretisá.
Reorganisashon
Na promé instante, djabièrnè anochi e hefe grandi di Krus Kòrá di Ulanda a splika e miembronan di direktiva di e seis islanan kiko e reorganisashon ta enserá. E tin di haber prinsipalmente ku e situashon na Ulanda. ‘Aktualmente Krus Kòrá ta konsistí di un Asosashon na kua tin diferente Krus Kòrá afiliá. Kada departamentu lokal tin su propio statutonan. Den e esei ta bai bin un kambio. Pa por funshoná mas efisiente i transparente’. Esaki ta e informashon ku Ingrid Jansen, mènèdjer di programa di Krus Kòrá di Antia i Aruba, a duna LA PRENSA.
E situashon riba e seis islanan antiano ta diferente kompará ku Ulanda, segun Jansen. Nan tin otro responsabilidat. Tòg e islanan ta wòrdu envolví, pasobra nan ta forma parti di Krus Kòrá di Ulanda. Un di metanan di e bishita di e hefe di Krus Kòrá di Ulanda, tabata pa konhuntamente wak kon por forma un eksepshon pa Antia i Aruba den e reorganisashon aki.
Djasabra tabatin un enkuentro mas grandi, ku e mesun miembronan. Ademas a asistí voluntarionan di Krus Kòrá, kende a diskutí ku señor Breedeveld, tokante di e reorganisashon.
Motibu di e reorganisashon ta sinta entre otro den e hecho ku e asina yamá ‘keurmerk’ pa reklutashon di fondo na Ulanda, CBF, den e situashon aktual mester wòrdu solisitá i pa kada departamentu individual. Komo ku e departamentunan na Aruba i Antia no tin nada di haber ku CBF, ta evaluando awor kon pa atendé ku e desishon partikular di e organisashonnan aki.
En general, segun Ingrid Jansen, e enkuentronan a bai bon. Denter di dos siman na Ulanda, ta tuma lugá un reunion general durante kua e desishon lo kai ku ta kontinuá si òf nò ku e proseso aki. Di Sint Maarten lo biaha un hende pa Ulanda, den representashon di e islanan Ariba, miéntras ku señor Ramirez ta bai Ulanda pa representá Antia i Aruba.