WILLEMSTAD – E aventuranan rondó di e kas di Marazul ta kontinuá. Despues ku e ganadó di e kas, Joëlla Smiet, a haña yabi di e kas i porfin por a drenta aden, a resultá ku deskonosínan a usa e kas i laga e tualèt tur shushi na fekalia. E premionan di Onenet i TDS ku el a gana, tampoko e no a risibí ainda.
LA PRENSA a trata na drenta den kontakto ku Smiet pa haña un komentario riba e vershonnan akí, pero esaki no ta logrando pa basta dia. Informashonnan ku LA PRENSA a optené di un fuente yegá na Marazul, a splika ku Smiet a yega kontentu ku su yabi den su man, pero a keda sumamente mal kontentu ora el a drenta den e kas pa promé bia. Segun e fuente, Smiet lo a enkontrá e tualèt tur shushi na fekalia di hende. Tambe por a nota ku tabatin un bentana kibrá na kurpa di e kas. Mas aleu LA PRENSA a komprondé di e fuente, ku enbèrdat tabatin hende den e kas na sigur un okashon. E hendenan ei sin embargo no tabata den kompania di Smiet. Esaki ta indiká, ku esunnan ku tabatin e yabi di e kas, pendiente pa entreg’é na Smiet, a hasi uso di e kas sin Smiet su pèrmit.
Un investigashon di LA PRENSA a konkluí, ku te ainda Smiet no a risibí e otro premionan ku el a gana tampoko. Ta trata akí di un abono riba TDS pa un aña largu i tambe un abono di Onenet pa un aña. Di parti di Lover’s, LA PRENSA a komprondé, ku Smiet a pasa tuma su promé baki di eiskrim. Esaki e lo sigui hasi un bia pa luna durante e próksimo 11 lunanan. LA PRENSA lo sigui trata na drenta den kontakto ku e ganadó di e kas di Marazul pa wak kiko a pasa eksaktamente den su kas. Intentonan pa haña un komentario di Tele-Kòrsou ku a organisá e konkurso no a duna resultado. E direktor di e planta ta den eksterior.