WILLEMSTAD – E komersiante Nanik Daryanani a muri asfiksiá. Esaki ta resultado di outopsia di lei ku Ministerio Públiko a laga hasi riba e restunan mortal. Polis a konfirmá ku djadumingu último a haña Daryanani morto den su negoshi. E tabata drumí riba e promé piso den su negoshi, ku un kusinchi mará ku waya di koriente na su kara. E víktima tabata doño di un negoshi den Bloksteeg, kaminda por a hasi uso di fasilidatnan di Internet. Djadumingu den kareda di kuartu pa un, famianan di e defuntu a lokalisá e kurpa sin bida. Mes ora polis a kuminsá ku un investigashon, hasiendo uso di loke nan a haña na e sitio di krímen. For di promé instante tabata remarkabel, ku na porta di e establesimentu ainda e yabi tabata kologá den e slòt. Entretantu ta konfirmá ku e víktima no tabatin heridanan di hinká ni di arma di kandela. E kusinchi ku tabata mará riba su kara, a fungi komo arma pa a asesiná e víktima.
Miéntras tantu famianan di Daryanani a organisá un despedida ku lo tuma lugá mañan na Alameda. Ayera e famianan a reuní ku Dowtown Management Organization (DMO) pa organisá e seremonia di honor pa Nanik Daryanani na Wilhelmina Park. Despues di e atrako/asesinato di Nanik Daryanani, tur famia a uni i pone man huntu pa organisá entiero i e seremonia di honor den un tempu rekòrt. Famianan a risibí hopi yudansa di tur banda, pa por a logra esaki. “Nos ta hopi kontentu ku tur e koperashonnan ku nos a haña di hopi hende i hasta klientenan di mi tata su negoshi. E desaroyonan di último dia ta demostrá ku nos tata tabata hopi stimá”, asina e yunan a bisa.
Durante e reunion ku DMO, a bin sali afó ku e seremonia di honor ta algu hopi importante pa e famia, ku lo dediká un seremonia pa honra Nanik Daryanani. E lo no ta e entiero pero mas bien un historia chikitu di Nanik ku a sirbi 47 aña den ekonomia di Kòrsou i Punda. Tambe lo tin spich di nos gezaghebber Sra. Lisa Dindial i tambe e yunan lo trese diferente presentashon dediká na e tata. E yunan ta bisa ku esaki sigur lo ta un seremonia hopi sentimental. P’esei nos ta invitá pueblo henter pa bini i mustra un sosten masal na Wilhelmina Plein dia 29 di mei 2008. E seremonia lo kuminsá 4:45pm. Pa loke ta trata e investigashon, e yunan a bisa ku e investigashonnan ta andando i ku e lo ta un kaso resolvé. Nan ta spera ku hustisia lo pone man riba e persona ku a kometé e akto aki i nan tin speransa ku e persona ku a hasi e akto inhumano aki, lo por realisá kiko el a hasi, arepentí i pidi pordon i salbashon di Dios.