WILLEMSTAD - Pa diputado di Kultura Marilyn Alcalá-Wallé e ultimo palabra definitivamente no ta bisá ainda. E mandatario ta konsiderá, ku tin mas ku un opshon riba mesa. Pero un bista realístiko ta indiká ku e opshon mas probabel awor aki ta di mantené Sentro Pro Arte kaminda e ta aktualmente, esta na Schouwburgweg.
E istoria di Sentro Pro Arte ta konosí. E lucha básikamente ta entre Fundashon Sentro Pro Arte, kende tin e sentro aktualmente bou di su maneho i e komishon ku ta lucha pa manera nan mes a bisa, reskatá Sentro Pro Arte pa pueblo atrobe.
E komishon ta akusá e fundashon di a laga e edifisio kai den un deterioro serio i ku nan no ta hasiendo nada pa e kousa kultural di Kòrsou.
Ainda ta fresku den memoria di tur hende, kon aña pasá e artista/lokutor/animador Gilbert Sparen a kuminsá ku un wèlga di hamber pa eksigí pa gobièrnu mantené Sentro Pro Arte na e sitio ku e ta awor aki i pa restourá e edifisio atrobe.
E problema prinsipal di e edifisio aktual ta e hecho, ku su bodega ta yena ku awa konstantemente. Pero a bin sali na kla, ku e edifisio di SSK tabata konfrontá e mesun problema i ku a logra solushoná esaki.
Despues di e wèlga di hamber di Sparen, a instalá un komishon ku mester a bai studia e 3 posibilidatnan ku tin, esta, traha un teater nashonal den área di Rif, traha un teater nashonal na kabes di Skalo òf mantené Sentro Pro Arte na Schouwburgweg.
E komishon, entretantu a raportá na gobièrnu i a mustra ku área di Rif ta práktikamente ekskluí. Awor aki tin plannan riba mesa pa desaroyá e área aki. Tin algun invershonista grandi ku ta hasiendo e trámitenan pa esei i e komishon no ta weta espasio pa un teater nashonal tambe.
E di dos opshon ku ta papia di Skalo, tambe ta pinta difísil awor aki. T’asina ku tin un kompania ta hasiendo investigashon di e suela den e área aki, pa weta te kon leu por konstruí edifisio riba esaki. Na momentu ku esei produsí un resultado positivo, ainda tin e situashon di tráfiko. Gobièrnu lo mester weta kon ta hasi Skalo mas aksesibel pa tráfiko.Ta un trayekto ku por dura largu, di akuerdo ku diputado Alcalá-Wallé.
Ta keda básikamente e di tres opshon, ku ta mantené e edifisio di Sentro Pro Arte kaminda e ta aktualmente.
Esei lo nifiká si dos problema ku mester solushoná. Na promé lugá, mester haña un solushon pa e problema di awa ku ta yena bodega di e edifisio konstantemente. Tin speransa ku esei lo no ta un problema insuperabel pasobra reportadamente e edifisio di SSK na otro banda di kaya tabatin e mesun problema i ekspertonan a logra solushoná esaki.
E otro punto ta sinembargo, e invershon ku mester hasi pa pone e edifisio bèk den kondishon ku e por sirbi komo un teater nashonal digno pa Kòrsou. Aki ta papia di algun mion ku ainda no sa for di unda e mester sali.
“Tur kos ta dependé kiko nos ta opta p’e. Si nos ta dispuesto pa warda, anto kisas e opshon di Skalo ta bira un opshon real. Pero si nos ke un teater nashonal riba término kòrtiku, anto e edifisio na Schouwburgweg ta keda e úniko opshon,” di akuerdo ku diputado Marilyn Alcalá-Wallé.