WILLEMSTAD - E mihó kos ku Kòrsou por hasi ta, di mantené neutralidat den tur konflikto regional i internashonal ku surgi. Ta esei semper tabata nos forsa. Ta esei a pone nos sobrebibí. Semper nos a mantené e punto di salida aki te ku awor, ku e insidente di e avion di guera merikano ku lanta for di nos teritorio bai provoká Venezuela.
Esei tabata mensahe di lider di frakshon di Niun Paso Atras den Konseho Insular ayera.
Konseho Insular a kuminsá debatí – riba petishon di partidonan di oposishon – riba e insidente ku a tuma lugá algun siman pasá, kaminda un avion F-16 di e base militar merikano establesé na Kòrsou Forward Operation Location (FOL) a drenta espasio aéreo venezolano, algu ku a okashoná hopi indignashon i desgustu serka gobièrnu venezolano. E asuntu ainda no a yega na un fin.
Nelson Pierre a rekòrdá ku den pasado, ki ora ku el a haña chèns, e tabata referí na e nesesidat pa tene kuenta ku siguridat di estado.
Awor aki, e asuntu a haña un derivado ku yama krísis alimentisio, el a haña un otro ku yama krísis energétiko i su rais ta sinta den e diferente movementunan sosial revolushonario den nos region, asina el a bisa.
E lider di Niun Paso Atras a referí na un parti di istoria, kaminda Merka a trata di ehersé su influensia riba desaroyo interno di Colombia.
“Ta bon pa nos pone e asuntu den konteksto”, asina el a bisa.
“Dia a anunsiá ku gobièrnu a tuma e desishon ku ta pèrmití Merka establesé un base militar na Kòrsou, a papia di benefishinan komersial i finansiero, ku esaki lo trese kuné pa ekonomia di Kòrsou. E tempu ei Kámara di Komersio i VBC tambe a ekspresá nan satisfakshon ku yegada di e base militar.
E pregunta ta awor: ta kua ta e benefishinan komersial finansiero ku nos pais a logra ku presensiá di e merikanonan aki? Nos ta papiando aki di un base militar, den un aeropuerto komersial. E kos aki ta úniko na mundu,” Pierre a duna di konosé.
El a referí tambe na e insidente resien kaminda tabatin un bombardeo na e área fronteriso di Ecuador. A bin sali na kla ku dos di e avionnan ku a partisipá den e bombardeo aki a sali di Kòrsou, e lider di Niun Paso Atras a afirmá.
“Outoridatnan venezolano”, asina el a bisa, “a partisipá ku a base di nan investigashon a bin sali na kla, ku ta imposibel ku toren di kòntròl na aeropuerto – ku ta esun ku ta determiná e plan di buelo – no a konstatá ku e avion merikano a drenta espasio aéreo venezolano.
Meimei di e kontroversia aki, tin deliberashon ta tumando lugá”, segun el a agregá, “pa papia riba kontinuidat di partisipashon di PDVSA den Refineria Isla.
Kòrsou”, segun Nelson Pierre, “semper a karakterisá su mes pa su abilidat pa mantené neutralidat den tur konflikto pafó di nos frontera. Ta esei mes a pone ku e konfiansa ku otronan tin den nos, a sigui oumentá.
Lamentablemente”, asina Pierre a konstatá, “Kòrsou a kuminsá hasi eskoho i ta enbolbiendo su mes den konfliktonan geo polítiko di nos region pa kua nos no tin forsa pa atendé.
En bes di keda leu for di konfliktonan internashonal, en bes di fiha posishon tras di kortina, nos ta tumando posishon kontra sierto gruponan, sin puntra nos mes kiko nos mes ta,” el a duna di konosé.
El a bisa, ku tin algun realidat ku nos mester tene kuenta kuné. Un di nan ta, ku nos no por detené e proseso revolushonario ku ta tumando lugá den nos region.
“Nos realidat ta, pa mantené neutralidat. Nos mester sirbi e venezolano, meskos ku nos ta sirbi e kolombiano i e chileno.
Kòrsou tin ku drecha barku di PDVSA, barkunan kolombiano i barkunan merikano. Turistanan ku ta bini nos pais, ta bini di e mesun region aki. Nos konosé awor aki un desaroyo hopi positivo di turistanan venezolano ku ta bin kambia dollar aki. Hotèlnan ta yen, apartamentunan tur ta yen, anto meimei di tur esaki nos ta haña un insidente manera esun ku a sosodé algun dia pasá,” Nelson Pierre a bisa.
Nelson Pierre sinembargo no por a finalisá su disertashon.
E reunion a keda limitá na e úniko miembro aki, debí na problemanan tékniko ku konstantemente tabata stroba e transmishon. Un estorbo a pone, ku kasi no por a skucha bos di esun ku ta papia. Na diferente okashon a para e transmishon pa weta si por haña un solushon.
“Mi ta e úniko miembro di Konseho Insular ku awe a papia, pero alabes no a papia,”asina Pierre a bisa den forma chistoso, despues ku na di tres okashon mester a suspendé e reunion pa e problemanan tékniko aki. Pero aparentemente no por a solushoná e problema, di manera ku gezaghèber a anunsiá ku ta posponé e reunion te dia 3 di yüni pa 9’or di mainta.