WILLEMSTAD - Dos wikènt tras di otro Federashon Biyar Kòrsou a tene aktividatnan pa su miembronan.
E promé tabata Bola 9 su promé tour i e di dos tabata e promé tour Straight Pool.
E promé aktividat a konta ku partisipashon di 54 hungadó, tabata un evento kargá ku sorpresa.
FeBiKo un bes mas ta elogiá ku e nivel di e deporte di Biyar ta sigui subi i hopi ta e biyardistanan ku ta dedikando mas tempu pa drecha nan nivel i konosé e disiplina mihó. Durante di e torneo aki hopi tabata e grandinan ku a haña sorpresa di nan bida na momentu ku nan no a logra ni pasa e di dos ròndu di buèlta di ganadó. Siendo ku e hungadónan aki manera un Johnny Helmund, Michael Arvelo, David Prins i Bryan Landskind ta hungadónan ku ta haña un puesto privilegiá den e torneo, no a logra di gana di nan kontrikantenan ku riba papel mester tabata hungadónan ku nivel muchu mas ménos ku nan.
Dos hungadó a dominá e torneo aki for di den prinsipio ku ta nos Kampion Hubenil Anthony Wever i Roberto “Tiko” Freitas.
Ámbos hungadó a keda den buèlta di ganadó te na final kaminda den un bon partido Tico Freitas ta manda e kampion hubenil den buèlta di pèrdèdó. Pero e kampion hubenil Anthony Wever mustrando su madures ta kita su kontrikante kual ta Bryan Farah den buèlta di pèrdèdó for di kaminda pa bin topa ku e wega di revancha kontra di Tico Freitas. Den un gran demostrashon di grandesa e kampion hubenil Anthony Wever i awor kisas rumbo pa ta kampion di federashon ta pasa relativamente fásil riba su kontrikante pa titulá Kampion di e Promé Tour di Bola 9.
Den e otro aktividat di FeBiKo si no a konta ku mes tantu partisipante ku esun anterior. Straight Pool o dieskuater punto un kontinuo (14.1 continious) ta un di e disiplinanan ku no ta wòrdu tantu praktiká aki na Kòrsou.
Solamente 13 biyardista a partisipá.
Entrená tin ku a praktiká e disiplina aki na Ulanda otro ta miembronan bieu di FeBiKo ku vários aña kaba ta praktiká Straight Pool den un grupo chikí.
Den e disiplina aki Johnny Helmund a logra gana e título.
Federashon di Biyar Kòrsou ta felisitá su miembronan ku e bunita logronan i alabes kier a invitá henter pueblo di Kòrsou pa por bin den fin di siman na Granbeeuw kaminda ta organisá e di dos Tour di Bola Ocho.