WILLEMSTAD - Despues ku a logra pone tur piskadó na altura di e desaroyo dje último reunion ku Marina Real, e piskadónan a duna nan representante mandato pa proponé un kompromiso ku Marina. Tabata un kaminda basta largu pa por a lokalisá tur e piskadónan pa splika nan detayadamente kon a bai ku e reunion ku Marina Real. Asina, e bosero Erwin Koense, a bisa LA PRENSA.
Algun dia pasá un delegashon di e piskadónan a reuní pa di dos biaha ku e alto representante di Marina, riba e problemanan ku e piskadónan ta topa, komo konsekuensia di e ehersisionan di tiramentu di Marina Real na Wacawa i besindario.
Erwin Koense, e bosero di e piskadónan malkontentu a bisa LA PRENSA, ku entretantu e piskadónan a duna algun remarke, riba resultado di e reunion. “N’e momentu aki, nos no por revelá kiko e proposishon ta. Ni tampoko no por duna publisidat na e posishon di Marina, ni esun di e piskadónan”. Asina Koense a remarká. “E proposishon di e piskadónan ta serka e komandante di Marina Real, kende tin e tarea pa analis’é”. Segun Koense, e piskadónan a asumí un posishon di espera pendiente pa yega na un solushon pa e problema aki.
E bosero dje piskadónan a remarká ku no ta trata aki di un problema ku ta fásil pa solushoná. “Ta trata di un situashon hopi delikado ku piskadónan ta konfrontá”. E entrenamentunan di Marina Real, for di tera dirigí riba laman i tambe for di tera pa tera mes, ta okashoná hopi problema pa nan, Koense a indiká.
Entretantu e piskadónan a haña e garantia, serka e representante di Marina Real, ku e problemátiko ta haña hopi atenshon.
Sin kier a drenta muchu den detaye, Koense a sigui bisa, ku den kaso ku Marina aseptá e proposishonnan di e piskadónan, pa yega na un kompromiso, esaki lo perkurá pa hopi trankilidat.