WILLEMSTAD - Ku 11 voto di e miembronan di koalishon na fabor i 6 di e miembronan di oposishon ku a vota kontra, Konseho Insular ayera nochi tempran a bai di akuerdo ku e presupuesto supletorio di Kòrsou pa 2008.
E presupuesto ta mustra un défisit di 67.9 mion florin, ku ta algu mas ku e 66 mion ku gobièrnu mes a antisipá anteriormente.
Manera ta konosí, gobièrnu di Kòrsou a primintí Konseho Insular fin di aña pasá, ku nan lo risibí e presupuesto supletorio na yanüari último.
Diferente desaroyo a pone sinembargo, ku esei no a resultá posibel.
Es mas: a bin aserka e desaroyo kaminda Ulanda lo no kontribuí mas pa kubri un parti di e défisit na e montante di 103 mion florin, loke ta hasi nesesario pa gobièrnu subi merkado di kapital atrobe pa fia e montante aki.
Durante tratamentu di e proyekto di lei ayera, diputado di Finansa Mike Willem a splika, ku e presupuesto ta sali for di loke el a yama e “worst case scenario”. Esaki ta nifiká, ku ta sali for di punto di bista, ku e 103 mion florin ku Ulanda a primintí den promé instansia, ku e lo kontribuí kuné, awor lo bin pa kuenta di Kòrsou mes.
Esei ta nifiká, ku ta Kòrsou mester weta kon e ta solushoná esaki.
Na di dos lugá, segun e diputado, ta sali for di punto di bista, ku lo bende Rif Resort na òktober awor.
Gobièrnu lo hasi tur loke ta den su alkanse di su parti pa sòru pa benta di e hotèl aki produsí mas tantu posibel.
Un di tres punto di salida pa e presupuesto ta e hecho, ku gobièrnu ta kalkulá ku e ta bai haña mas entrada di impuesto, a base di mas entrada di impuesto di entrada.
Gobièrnu ta basa su mes riba e hecho, ku sifranan di e promé 4 lunanan di e aña aki ta duna un indikashon kla, ku entrada di gobièrnu lo oumentá e aña aki.
Un otro aspekto di e presupuesto aki ta e kompromiso ku gobièrnu tin ku Stichting Studiefinanciering Curaçao, SSC. Ta konosí ku gobièrnu ta trahando riba un solushon struktural i duradero pa e problemanan finansiero di SSC. E fundashon ta den problema pa basta tempu kaba i ta buskando un solushon permanente. Resientemente diputado di Enseñansa Marilyn Alcalá-Wallé tabata na Ulanda, kaminda el a hiba deliberashon ku outoridatnan di enseñansa den ki forma Ulanda por duna sosten (tékniko i finansiero) na teritorio insular di Kòrsou pa solushoná e problemanan di SSC.
Diputado Mike Willem a splika, ku e ta konsiderá ku ta importante pa gobièrnu di Kòrsou mantené e kompromiso ku e tin pa sòru pa studiantenan por sigui haña nan plaka.
Komo tal, a adaptá e presupuesto pa garantisá di e forma aki, ku gobièrnu por sigui kumpli.
“Final di kuenta”, segun e diputado, “tin un último aspekto ku a tene kuenta kuné, esta e hecho ku den konsulta ku Gobièrnu Sentral lo bai atendé e asuntu di mandamentu di pashènt den eksterior pa kuido médiko avansá den otro forma. Banko di Seguro Sosial lo asumí su responsabilidat den esaki”, segun e diputado.