STOCKHOLM, SUECIA - Un konferensia internashonal di un dia pa evaluá situashon global na Irak a kuminsá awe na Stockholm na Suesia, un foro di Nashonnan Uní, ku intervenshon di Promé Minister sueko Fredrik Reinfeldt.
“Nos ta kla pa apoyá Gobièrnu di Irak i tur irakí den búskeda di un pais soberano, demokrátiko, uní i próspero”, Reinfeldt a deklará na apertura di e reunion.
Un sentenar di delegashon, ku presensia di Promé Minister irakí Nouri al-Maliki, Sekretario General di Nashonnan Uní, Ban Ki-moon, i Sekretaria di Estado di Merka Condoleezza Rice, ta partisipá na e konferensia aki riba Kontrato Internashonal di Ophetivonan pa Irak (ICI).
E plan aki ku ta buskando reforsá seguridat i mehorá ekonomia irakí adoptá na Sharm el-Sheikh na Egipto 3 di mei 2007 den un konferensia internashonal, durante kua alto responsabelnan di mas ku 60 pais i organisashonnan a primintí anulá mas o ménos 30.000 mion dollar di debe.
“E trabou no a terminá ainda, asina ta ku komunidat internashonal mester respaldá Irak den su esfuerso pa avansá”, Rice a bisa.
Promé Minister di Irak Nouri al-Maliki a bisa ku e tarea di rekonstruí su pais tabata mas difísil ku kontrarestá terorismo, i el a manifestá su speransa ku otro nashonnan lo ofresé yudansa pa alivio di e debe eksterno irakí.
Ayera, e mayó bloke musulman sunita a suspendé kòmbersashonnan pa reinkorporá Gobièrnu irakí, enkabesá pa chiitanan.
Fo’i Bagdad, un koresponsal di BBC a destaká e meskla di optimismo i fragilidat ku ta prevalesé na Irak.
“E forsanan militar merikano ta bisa ku e violensia na Irak ta den punto mas abou den kuater aña. Pero e progreso den seguridat i den e reforma polítiko i ekonómiko ta manteniendo frágil manera suspenshon di e kòmbersashonnan a mustra, di parti di e bloke polítiko sunita prinsipal pa integrá Gobièrnu chiita di Maliki”, e koresponsal a señalá.
Ta realisá e konferensia di Nashonnan Uní na Upplands Vasby, situá mas o ménos 25 kilometer di Stockholm, i ta tumando lugá meimei di medidanan fuerte di seguridat.