WILLEMSTAD - Pa awor aki no ta bin un direktor pa Beach Management Authority. Pero dia nombra un direktor mes, definitivamente e no ta bai gana 56 mil heldu. Esei diputado di Turismo Gerrit Shotte a ripití na diferente okashon durante tratamentu di e proyekto aki den Konseho Insular di Kòrsou.

E punto aki tabata un dje puntonan di preokupashon pa frakshon di Frente Obrero, banda di e hecho ku e frakshon a bisa di tin duda si e e fundashon lo bai ekskluí nos mes hendenan di playanan ku awor aki ta liber. Manera LA PRENSA a informá ekstensamente kaba, diputado Schotte a ripití na diferente okashon ku no ta bai traspasá ningun playa pa ningun hende, ningun organisashon, tampoko pa BMA. BMA lo keda enkargá ku solamente maneho di e playanan a base di un kontrato entre BMA i gobièrnu di Kòrsou. De fakto, gobièrnu ta kumpra servisio serka BMA, ku otro palabra, gobièrnu por stòp esaki kualke momentu, diputado Schotte a bisa ku énfasis.
Tur playa públiko, en todo kaso e 13 playanan ku ta kai awor bou di Beach Managerment Authority ta keda liber aksesibel pa tur hende.
Tur hende por drenta ku nan kosnan I lo no ser limitá den nada.
E hecho ku no a laga LVV mes hasi e trabou di maneho di playanan no ta nifiká, ku niun hende ta pèrdè trabou. LVV ta mas ku simplemente mantenshon di playa.
“Ta manera e nòmber mes ta bisa: e ta un servisio enkargá ku agrikultura, krio di bestia i peskeria,” di akuerdo ku Schotte.
“Di otro banda t’asina ku LVV ta disponé di hopi ekspertisio di nos playanan. Ta pesei a hinka LVV tambe den direktiva di BMA I ta enkarg’é ku e puesto di vise presidensha”, segun e diputado a añadí.
“Nada no ta bai kambia. Playanan lo keda aksesibel pa tur hende, tur hende lo keda ku e libertat pa drenta playa ku loke nan ke. E úniko kos ku por kambia ta reglanan por ehèmpel kon ta tene e sitio limpi”, asina e diputado a ripití.
Tabata lider di frakshon di Frente Obrero Anthony Godett ku na diferente okashon durante transkurso di e reunion, a denunsiá, ku e tin informashon ku e direktor di BMA lo bai gana e salario astronómiko di 56 mil heldu.
“Mi ke anunsiá, ku asta nòmber di e persona mi tin. Su fam ta kuminsá ku H. Mi tin e nòmber kompleto, si ta nesesario lo mi menshon’é kompleto tambe,” Godett a afirmá durante e reunion.
Diputado Schotte a splika, ku no ta intenshon pa awor aki nombra un direktor. E trabou lo ser realisá pa direktiva di e fundashon mes. Aki tres aña, lo evaluá institushon di un direktor. Pero te asta e ora ei, e no ta bai gana e montante astronómiko aki. diputado Schotte a sigurá, bisando den mesun rosea ku oposishon ta tratando di venenamente di esnan konserní den komunidat.

Score: 0.0, Votes: 0