ORANJESTAD - Un otro Youth Explosion ta den porta y Ministerio di Hoben Catolico di Aruba ta den preparacion completo pa e di 16 conferencia. E aña aki esaki lo tuma lugar dianan: 27, 28 y 29 di Juni 2008, na Colegio E.P.I. na oranjestad y lo tin como tema: Cristo Nos Speransa.
Si nos mira e situacion na mundo actual caminda tur parti tin crisis financiero, material y particularmente moral, nos ta sigur cu Cristo Hesus ta nos unico speransa. E ta nos consuelo, e baranca fuerte na kende nos tin cu ankra duro. Ta Cristo Hesus so por ta nos speransa na momento di crisis den nos bida. Specialmente pa nos hobennan, speransa den Cristo ta necesario, pa nan por hisa cara y wak futuro sin miedo. Esaki ta momento pa nan confia totalmente den e amor y gracia di Dios, pa medio di Cristo Hesus nos Salbador.
Aña pasa nos a celebra e di 15 conferencia na grandi, cu participacion di diferente paisnan, pero e aña aki nos ke tene un Youth Explosion mas chikito caminda nos lo tin lugar pa solamente 250 participante. Pa trece e ambiente di Youth Explosion, Ministerio di Hoben Catolico di Aruba lo tin un anochi di Alabansa, caminda nos ta invita tur esnan cu a participa na un of mas conferencia e añanan anterior, pa bini hunto y gosa den e presencia di Dios, den e “style” cu Youth Explosion so tin.
Esaki ta tuma lugar diabierna 30 di mei 2008, di 7:30 – 10:00 p.m. na Centro di Bario Tanki Leendert. Durante e anochi aki Ministerio di Alabansa y Adoracion, bou direccion di Gregory Goedgedrag lo anima tur presente cu canticanan di Alabansa. Tambe lo comparti e Palabra di Dios. Ademas durante e anochi aki tambe nos lo tin benta di e ticketnan di Youth Explosion. Mirando e cantidad limita, nos ta encurasha tur hoben entre 13 pa 25 aña cu ke participa, pa nan cumpra nan karchi na tempo pa nan no keda afor. Tambe lo tin snacks, soft y juice na benta pa asina recauda fondo pa e conferencia.
Nos ta gradici di antemano tur esnan cu a coopera cu nos den un of otro forma caba, specialmente e sponsornan pa donacion pa e conferencia. Tambe nos ta gradici Centro Bario di Tanki Leendert pa huur di nan localidad y tambe un danki grandi ta bai na Colegio E.P.I. pa duna nos un lugar hopi bunita y adecuado. Dios Bendiciona boso.
Si tin mas comerciantenan y personanan individual cu ke duna nos nan aporte financiero, manda nos un e-mail of yama nos libremente. Pa mas informacion por chek nos website www.youthexplosionaruba.org of por manda nos un e-mail na youthexplosionaruba@gmail.com.
Pues di curason ta bai un invitashon na e pueblo di Aruba en general y hubentud specialmente pa bini hunto diabierna awor y cuminsa cu e ambiente na caminda pa Youth Explosion Aruba 2008. Corda cumpra bo karchi trempan, paso “op is op”.
Danki di antemano pa boso cooperashon di semper y Dios Bendicionan boso ricamente!
Hoben Dios ta yama bo, bo ta cla pa su amor? Bo ta cla pa sirbiE y haya su salbacion? Cu alegria nos tambe ta celebrando 50 aña di nos Diocesis!