WILLEMSTAD – E di dos dia di akshon di shofùrnan di bùs a kuminsá relativamente trankil. Polis no mester a intervení den tráfiko, ya ku e shofùrnan no a blòkia niun kaminda. Entretantu e sindikato PWFC a anunsiá, ku nan ta sostené e akshonnan di STU.
Awe mainta tur kaminda kayanan tabata liber pa tráfiko. Na niun krusada no tabatin shofùrnan di bùs ku a blòkia kaminda. Mainta tempran un loader mester a kita un seru di tera ku deskonosínan a basha meimei di kaminda na un krusada na Montaña. Mas lat mainta, polis mester a sera e área rondó di e pòmp di gasolin na Colon, despues ku a drenta un anunsio di bòm. E efektivonan di e tim di aresto ku ta di trein pa lokalisá eksplosivo, a listra den e área pero no a lokalisá nada. Ayera polis a laga shofùrnan ku si kier a traha, usa Colon pa baha nan pasaheronan.
LA PRENSA a komprondé ku ayera nochi tur pòmp di gasolin tabatin vigilansia èkstra, despues ku tabatin rumornan ta sirkulá ku lo a bai sea destruí òf blòkia un òf mas pòmp di gasolin. Sin embargo no tabatin niun suseso di tal índole. E insidente di ayera tardi na Betèsda, kaminda polis lo a lastra un shofùr di bùs riba kaya i lag’é dal su kabes, a resultá di no ta korekto. For di imágennan di filmashon por a mira ku e shofùr di bùs no a dal su kabes. E investigashon ta kanando pa konkluí esaki ofisialmente.
Miéntras tantu direktiva di PWFC a drenta un reunion awe mèrdia pa trata e último desaroyonan. Informashonnan ku LA PRENSA a haña ta hasi menshon di e hecho, ku PWFC lo bai hinka trahadónan ku ta suministrá gasolin den akshon komo muestra di solidaridat. E informashon a plama mesora i por a nota un oumentu di aktividat na pòmpnan di gasolin. Mester bisa, ku no ta promé bes ku e informashon aki ta bin den publisidat. Durante e promé akshon di STU dos siman pasá tambe e mesun informashon a plama.
PWFC tin representashon na 13 kompania lokal, pero e sektor ku e por influensiá ku mas impakto direkto ta e sektor di entrega di kombustibel. Di otro banda sinembargo, LA PRENSA tin informashon ku gerensia di CUROIL lo no para mira sin hasi nada, komo ku e kompania no tin ningun konflikto ku e sindikato.
Un di e motivashonnan pa PWFC drenta den akshon ta e asosashon di su presidente ku konsehero di STU, Errol Cova. Presidente di e sindikato, Elvis de Andrade tabata riba lista di e partido di Cova, PLKP den e último elekshon.
Te na momentu ku nos a sera nos edishon di awe, no tabata posibel haña un komentario di De Andrade riba nan posishon. E otro sindikatonan ku biaha pasá a duna sosten na STU, miéntras tantu no a bisa nada ainda, entre nan e sindikato SITCOM. Otro gremionan ku tambe a ekspresá solidaridat biaha pasá a keda ketu e biaha aki, aparentemente komo ku nan miembronan ta sufriendo di e impakto di falta di servisio den transporte públiko. Entre nan tin e asosashon di penshonado. E akshon di ayera a afektá hopi hende grandi den komunidat ku no ta disponé di transporte adekuá.