CIUDAD DE PANAMÁ, - E hefe di polis uniformá chileño a muri ayera huntu ku otro 10 persona, ora e helikòpter den kua nan tabata biaha a dal kontra un edifisio di un zona residensial di Ciudad de Panamá, kaminda e tabata di bishita, funshonarionan a bisa.
Kansieria chileño a konfirmá na Reuters ku e hefe di Carabineros di Chile, e general José Alejandro Bernales, di 59 aña, i na mando di polis fo’i novèmber 2005, a fayesé den e aksidente ku a parti e helikòpter na dos, i e edifisio di haltura abou a pega na kandela.
E esposa di Bernales, dos komandante, e dama di un di nan i un kapitan tambe a fayesé den e aksidente, di akuerdo ku Ministerio di Interior di Chile.
Den e helikòpter ademas tabata biaha 6 panameño, di kendenan solamente un di nan a sobrebibí e aksidente.
“Gobièrnu profundamente ta lamentá morto di un destaká ofisial i ta ekspresá su mas sentido kondolensia na Carabineros di Chile p’e pèrdida trágiko aki”, Minister di Interior chileño, Edmundo Pérez Yoma, a bisa.
“Nos a pèrdè un amigu”, el a agregá den deklarashonnan na Prensa na Santiago.
E chileñonan tabata na Ciudad de Panamá pa partisipá na konferensia riba kombate kontra terorismo, alkalde di e kapital, Juan Carlos Navarro, a bisa Reuters.
Servisionan di emergensia di Panamá a bisa ku lo por tin mas morto i un koresponsal di Reuters na e esena a mira pidanan di kurpa humano riba kaya huntu ku e edifisio kaminda tin un tienda i ofisinanan.
Un testigu kende tabata pasa n’e zona, Arcenio Lastra, a konta ku e helikòpter a eksplotá despues di dal kontra e edifisio.
Motibu di e choke no a keda aklará inmediatamente, pero outoridatnan aeronóutiko di Panamá a bisa ku e helikòpter ta un modèl bieu di kabamentu di dékada 1960.
Miéntras tantu, na Chile a deklará luto nashonal i Presidente chileño Michelle Bachelet a suspendé un gira na nort di e pais.
“Pa mi komo Presidente ta un doló tremendo! E tabata un gran direktor di Carabineros”, Bachelet a bisa periodistanan na siudat di La Serena, situá nort di Chile, promé ku el a regresá Santiago.
Bernales a sobrebibí e aksidente, pero el a muri poko despues na hospital, segun e dama Presidente.

Foto: Panama helikopter aksidenta 3005

Agentenan di polis ta sera e área kaminda e helikòpter a dal kontra un edifisio na Ciudad de Panamá.

Foto; Jose Alejandro Bernales 3005

Direktor di polisnan nashonal chileño, José Alejandro Bernales, di 59 aña, riba pòtrèt di archivo 21 di mei 2008, durante seremonia na Valparaiso, Chile.