WILLEMSTAD - Un di e kosnan ku TAS ta kere ku por traha riba dje ta áwaseru. Anke awa no ta kai henter aña den forma konsistente, tin sufisiente áwaseru ku nos por fangu i reservá pa e periodonan ku no tin áwaseru, asina Don Martina a splika. El a bisa ku áwaseru ta e bendishon di Dios. Disponibilidat di awa, den kantidat sufisiente i di bon kalidat, ta un di e faktornan prinsipal ku ta determiná ku e proyekto ta logra òf ku e ta frakasá. Ta masha remarkabel ku nos ta skucha gritunan pa desaroyá energia di bientu, energia di solo, energia di awa di fondo di laman, pero nos no ta tende kasi nada tokante uso di áwaseru. Anualmente Kòrsou ta keda bendishoná ku un averahe di 500 mm di áwaseru. Si nos logra fangu maske ta 10% di loke ta kai riba nos isla, nos lo por igualá loke Aqualectra ta produsí pa aña. Ta bèrdat ku no ta tur dia, ni tur siman ni tur luna awa ta kai. Pero, e ta kai si, anto 500 mm pa aña. Meskos ku den turismo nos konosé low season i high season, i ku den high season ta generá sufisiente entrada pa sobrebibí den low season, meskos nos por trata áwaseru tambe. Pues nos por kolektá awa durante lunanan ku hopi áwaseru, pa superá e temporada di sekura. U’n ta esaki nos grandinan a hasi den pasado? No ta asina ku den Karibe, te dia djawe, ta fangu áwaseru? Hasta na Hulanda, ku un averahe di 800 mm pa aña, Gobièrnu ta hiba un maneho konsiente pa promové pa fangu áwaseru i ta supsidiá esnan ku instalá fasilidatnan pa fangu áwaseru, asina Martina a bisa.
P’esei tambe el a hasi un rekomendashon spesial na Gobièrnu ku na su opinion tin e deber di formulá i ehekutá un maneho integral pa áwaseru, awa supsuelo, awa resiklá, awa destilá i awa di laman. Pa formulá un plan integral i sostenibel ta eksigí tempu. Sinembargo tin algun akshon ku Gobièrnu por tuma entretantu ku no ta stroba preparashon di un plan integral. Nos ta pensa e.o.:
• ku Gobièrnu por tuma komo regla ku den futuro tur kas di FKP ta keda konstruí ku fasilidatnan pa fangu awa;
• ku proyektonan di infrastruktura nobo no ta kanalisá awa pa laman mas;
• ku ta duna insentivo finansiero na tur esnan ku tin i lo bai tin fasilidat pa fangu awa;
• ku ta intensivá kampañanan di informashon kon pa kolektá áwaseru na un manera responsabel;
• ku ta oumentá e supsidio di Fundashon pa Konsumidó pa e organisashon aki por hasi su trabou di informá i rekomendá pueblo den su eskoho i kompra pa yega na alimentashon balansá i salú”, asina Martina a bisa.