WILLEMSTAD – Polisnan na Ulanda ku no slag pa nan eksamen di tiru òf pa un otro prueba, mester entregá nan arma reglamentario. Esaki ta òrdu ku minister Guusje Ter Horst a duna, despues ku a sali na kla ku diferente polis ta kana rònt ku nan arma, miéntras nan no a slag pa tur nan eksamennan.
Segun informashon ku a sali publiká, no ta trata di arma di kandela so, sino tambe di klòp, bui i pepperspray, ku e polisnan lo tin ku entregá tanten ku nan no slag. Tin indikashon ku di un kantidat di 950 polis ku no a slag pa nan eksamen periódiko di tiru, un gran kantidat tòg ta kana rònt ku nan arma di kandela. Tin tambe alrededor di 275 polis ku no a slag pa otro pruebanan i di kua no ta konosí kuantu a keda ku nan armanan. E otro pruebanan ta entre otro instrukshon di violensia, ku ta indiká kon i ki ora tin ku usa bui, pepperspray i klòp.
Minister Ter Horst a eksigí di tur e hefenan di e 25 kuerponan di Ulanda, pa nan tuma e armanan mas lihé posibel. Ta konosí na Ulanda ku serka kasi tur e kuerponan, registrashon di armanan ku polisnan entregá, ta hopi defisiente. Pa e motibu akí no por bisa eksaktamente kuantu polis ta kana rònt sin ta kumpli ku e eksigensianan pa karga arma. E hefenan di e diferente kuerponan ta bisa ku mayoria arma ta entregá, pero nan no ta bon registrá. E problema di atministrashon akí lo ta eksistí hopi aña kaba.
Entretantu tin un kantidat di 1200 polis menshoná, ku lo ta kana rònt ku nan arma ounke ku nan a zak pa nan prueba di tiru. E kantidat di 1200 akí ta menshoná den e sifranan anual di polis di 2007. Un bosero di e Hunta di Alto komisarionan a bisa ku sigur no tin 1200 polis ku no ta kumpli ku e eksigensianan pa tin nan arma. Segun e bosero, e problema ta prinsipalmente e registrashon di e armanan entregá. Sin embargo e alto komisarionan ta komprondé, ku e minister ke pone tur kos na òrdu. Pa e motibu akí tambe e tòp di polis a aseptá e òrdu di e minister. E sifranan di mitar aña di Kuerpo Polisial ku no a sali publiká ainda ta indiká, ku entre tantu tin progreso den e registrashon di armanan entregá.

Kòrsou

Akí na Kòrsou tambe tabatin un situashon similar algun tempu pasá ora a sali den publisidat ku tin aspirantnan di polis ku no a slag pa nan eksamen, ta ketu bai den poseshon di nan arma reglamentario. E kaso akí a sali den publisidat despues ku durante un kòntròl di tráfiko, polis a lokalisá un arma di kandela den outo di un polis aspirant ku tabata na kas pa basta tempu. E polis lo tabata pendiente pa pasa algun eksamen di nobo pa e por a regresá den kuerpo. E polis ku a lokalisá e arma durante e kòntròl, a detené e polis aspirant ku no por a identifiká su mes na e momentunan ei. Despues di investigashon a resultá, ku e polis aspirant tabata kore ku su arma, pasó na su kas e no tabatin un kaminda adekuado pa ward’é. Pa evitá ku ladron lo a hòrta e arma ora no tin niun hende na kas, e polis a opta pa kada bia ku e sali kas e bai ku e arma. Algun tempu pasá un ladron a hòrta e arma reglamentario di e hefe di kuerpo polisial di Kòrsou. A detené e ladron e mesun anochi i rekobrá e arma. Tabatin rumornan ku e ladron a bai ku tur e dos armanan di e hefe di kuerpo, sin embargo no a konfirmá esaki nunka.