ORANJESTAD- Diadomingo mainta 8 di juni lo tin un concierto di e coro Mélange, bao guia di Maybelline Arends-Croes y di e conocido guitarista Ivan Jansen cu su cuarteto.
E concierto aki ta bao di auspicio di Circulo Arubano Pro Arte y ta tuma lugar na Holiday Inn Hotel, las Palmas Ballroom, cuminsando pa 11’or di mainta.
Mélange ta un coro di adulto cu a ser lanta na Augustus 1994. E miembronan di coro a scohe e nomber Mélange como cu a uni dos coro existente, esta Fuga y Cristal, pa forma e grupo Mélange.
E coro ta canta regularmente durante celebracion eucaristico na Misa den weekend y tambe pa Pasco di Nacemento, Pasco grandi y otro dianan di fiesta di iglesia tambe. Últimamente nan a canta un Misa completo, tanto pa e apertura di e celebracion di e Aña di Hubileo di obispado di Antiyas/Aruba, como pa e celebracion principal na Aruba riba 4 di mei ultimo.
Ademas nan ta canta na actividadnan social y cultural. Mélange a yega di saca un cd ‘religioso’ titula”Duna Amor” cu canticanan di bon mensahe (inspirational songs), tambe algun single cu grabacionnan pa Pasco of otro temporada di aña.
E guitarista Arubiano Ivan Jansen, ta hopi conoci pa su diferente conciertonan, tanto clasico como di jazz y tambe pa e bunita cd-nan cu el a yega di saca, esta Con Alma I, Con Alma II y Versatility. Ultimamente el a saca un cd nobo titula ’Jazz at the Links’ riba cual e ta toca cu su cuarteto.
E cuarteto ta consisti di Ivan na guitara; Franklin Granadillo, trompet; Roy Croes na baho y Richard Holmond na bateria. E cuarteto aki di cual mayoria di e musiconan a sigui nan estudio na e prestigioso Berklee College of Music na Boston, ta toca na “Windows on Aruba” na Divi Links.
Hopi persona eynan a acerca nan cu e pregunta si nan tin un cd cu e piesanan cu nan ta toca. Esaki a conduci na saca e cd aki.
Sergio Jansen, jiu homber di Ivan tambe lo presenta huntu cu e cuarteto. Sergio ta guitarista y studiante na Berklee College of Music na unda el a ricibi un Outstanding Musicianship Award recientemente.
Durante e concierto aki e publico por tende diferente di e piesanan bunita cu ta riba e cd aki entre otro boleros, pop jazz, musica Brasilero y piesanan di compositornan local. Esaki lo bira un concierto hopi special.
Entrada general ta fl. 35,-; miembro ta paga fl. 25,- y carchi pa hubentud ta fl. 15,- Por cumpra carchi cerca e miembronan di coro Mélange y e integrantenan di Ivan Jansen Quartet y si resta na porta Diadomingo mainta na Holiday Inn Hotel.