ORANJESTAD - Ora cu nos kier logra algo den bida nos tur tin cu planea pasobra nos no tin e recursonan financiero pa haci tur loke nos ta desea di haci den nos bida. Aruba como isla tambe tin cu haci esaki.
Dor di esaki desde januari di e aña aki e proceso Nos Aruba 2025 a cuminsa pa determina e vision pa Aruba te cu aña 2025 cual ta aporta na un desaroyo di Aruba duradero. Den un forma participativo cu participacion di sector di gobierno, priva, organizacionan no gubernamental y comunidad en general lo formula un vision pa Aruba te cu aña 2025.
Un di e resultado di e proceso aki ta pa traha un plan nacional integral strategico pa Aruba. E methodologia cu ta wordo usa ta uno participativo y cu ta enfatisa e parti positivo di bida, e ta analiza kico ta bay bon.
E método aki ta wordo usa door di haci preguntanan positivo na diferente miembronan den e comunidad.
Como parti di e proceso aki 54 persona di diferente sector y disciplina a ricibi training pa por guía e proceso aki. Puntonan interesante di e training aki ta pa nos wak cua ta e posibel forsanan mundial, internacional, regional y na Aruba cu tin influencia riba desaroyo duradero, esta riba e tereno social, tecnologia, economia, medio ambiente y politica.
Ademas, kico ta e consecuencianan di e forsanan aki ariba Aruba su futuro. Por ehemplo, un forsa global cua tin influencia riba nos economia ta e prijs di petróleo.
E prijs di petróleo ta determina e prijs di gasolin. Tambe e balor di e dollar Americano tin influencia riba nos economía ya cu e economía di Aruba ta depende di un gran parti di e turismo Americano cu ta paga cu dollar na Aruba.
Identifica e posibel forsanan aki riba e diferente terrennonan menciona ta necesario pa haci planificación pa e futuro di Aruba y kico e consecuencia di e diferente forsanan ta riba planificacion.
A base di esakinan lo determina cua recursonan Aruba tin awe cu mester wordo manteni, cua recursonan di Aruba mester expande y tambe cua recursonan mester wordo crea.