YOUXIAN, China, - China a evakuá mas o ménos 200.000 persona for di un área menasá pa inundashonnan pegá ku episentro di e temblor di e luna aki na provinsia di Sichuan, agensia estatal di notisia chines Xinhua a informá awe.
Polisnan a rekoré e pueblo di Youxian, situá pegá ku e siudat di Mianyang, ku a keda devastá pa e temblor di 12 di mei último, gritando “evakuá! evakuá!” atrabes di megafon.
E pueblo tabata parse bashí, ku negoshinan será i niun hende den edifisionan di bibienda, miéntras e agentenan tabata buska e hendenan ku tabata keda den e tèntnan improvisá lantá kantu di riu Fu.
A duna òrdu na e habitantenan di Youxian pa nan bai e zonanan mas haltu di e kolinanan ku ta rondoná e pueblo.
Miéntras tantu, mas ku shen sòldá tabata koba kanalnan den un intento pa redusí e preshon riba e riu serkano, blòkiá pa lòsmentu di tera, pa evitá ku e riunan ta desbordá i inundá e áreanan alrededor.
“No sa kuantu tempu mester keda aya riba. Ta dependé di e situashon di e dikenan”, un ofisial di polis a bisa Reuters, kende no kier a identifiká su mes.
E sifra ofisial di morto pa e temblor ta 68.858 persona i ta ferwagt ku esaki lo oumentá, ya ku ainda tin 18.616 hende pèrdí.
E outoridatnan a bisa ku mas ku 30 riu blòkiá por desbordá, inundando pueblonan i kampamentunan di refugiado.
Un gran parti di e trabounan di kontenshon, un dike konstruí pa deskargá awa di e lago na Tangjiashan a keda kompletá, Xinhua a bisa, sitando Yue Xi, supdirektor di e sekshon di awa i koriente di polisnan.
Xi a bisa ku ta spera ku e dike lo kita e awa entre mañan djadumingu i djamars.
Xinhua a informá ku tin plannan di kontingensia pa evakuá asta 1.3 mion persona, dependiendo kon e situashon desaroyá.
Filanan largu di trùk a yega e área di desaster kargá ku tèntnan i otro suministronan p’e hendenan evakuá.
Un Airbus 380, e avion mayó di pasahero, a bula bai e siudat di Chengdu awe, ku provishonnan di emergensia.
E movementu di míles di refugiado n’e área, algun di nan biahando sin instrukshon ofisial debí n’e temor p’e réplikanan di e temblor, ta sigui difikultá e trabounan pa reuní e famianan.
A reuní mas ku 6.000 mucha ku nan mayornan, pero 1.800 mucha ainda no por a haña kontakto ku nan famia, Xinhua a informá.
Miéntras tantu, e sifra di morto p’e áwaserunan torensial na 12 provinsia di sùit i ost di China, inkluyendo Guizhou, Hunan i Hubei, a oumentá bira 93, miéntras 43 ta pèrdí.
E inundashonnan a afektá mas ku 9 mion persona i a kousa pèrdidanan ekonómiko pa 5.000 mion yen (mas o ménos 465 mion euro), China News Service a bisa, sitando outoridatnan lokal.

Foto: China obreronan 3105

Obreronan chines ta traha poniendo bareranan kantu di riu Mianyuan na provinsia di Sichuan.

Foto: China homber 2105

Un hòmber ta kana pasa riba brùg ku a haña daño p’e temblor di 12 di mei último na provinsia di Sichuan.

Foto: China homber kama 3105

Un hòmber ta karga un kama pa bai ku ne na un kampamentu di refugiado na pueblo di Youxiang.

Foto: China mama yora 3105

Mama di un studiante ta yora, pa motibu ku su yu a muri ora su skol a kòlèps p’e temblor di 12 di mei último na provinsia di Sichuan.