WILLEMSTAD – “Gobièrnu di Kòrsou no ta bai ekspandé e kantidat di pèrmit di bus ku tin awor aki na Kòrsou. Mi ta wardando konseho di nos departamentu hurídiko AJZ riba esaki”, asina diputado Anthony Godett a anunsiá.
Diputado Anthony Godett, kende ta e diputado responsabel pa transporte públiko aki na Kòrsou, a indiká tambe, ku esaki ta parti di e proseso pa yega na un restrukturashon profundo i kompleto di e sektor aki.
Awor aki Kòrsou tin 400 bus, 200 shofùr ouksiliar koriente bus i 200 taksi ta kore rònt. Esaki, banda di e kompania di konvoi ABC ku tambe tin un kantidat di konvoi koriendo diariamente riba nos isla.
Mester ta evidente pa tur hende ku nos ta papiando aki di un kantidat eksesivo di medio di transporte, e diputado a bisa.
El a mustra ku loke ta esensial awor aki ta pa yega na un mihó organisashon di transporte públiko.
Transporte públiko, asina el a bisa, ta den un proseso di reorganisashon. T’asina ku gobièrnu entretantu a duna lus bèrdè na e dokumento ku ta kontené un vishon kon transporte públiko mester bira den futuro ( e asina yamá “visiedocument”).
Basá riba esaki, a repartí entretantu e dokumento pa tur partner enbolbí pa den dos luna di tempu, nan duna nan opinion. Originalmente tabata intenshon pa duna espasio te fin di yüli, pero mirando e desaroyonan di último dianan, posiblemente lo bai kòrta den e periodo aki pa aselerá e proseso di reorganisashon.
“E idea ta”, segun diputado Godett, “pa implementá e ideanan den e dokumento di vishon.
Ami ta kere, ku esei ta salbashon pa e sektor aki. Ta ideanan ku ta bon pa e konsumidó, e ta bon pa e sindikato, e ta bon pa komunidat. Básikamente loke nos vishon ta pa reglamentá transporte públiko. Shofùr di bus, taksista i e konvoi/vèn ku ta transportá turista den forma di tour, ta haña un bech pa identifiká nan mes. Lo tin sanshon mará na esaki.
Lo pone koló na bòrchi den bus pa sa kua distrito e ta kore. Tambe lo bin kámara den e bus pa siguridat di e shofùr, pa si algu pasa por sa ta ken. Loke ta importante tambe ta, ku lo implementá e asina yamá sistema GTS, kaminda tur momentu por sa unda e shofùr ta koriendo,” e diputado a splika.
E mandatario a sigui splika, ku e shofùr lo no tin ku karga mas e so, ku e gastunan di su vehíkulo. E idea ta, pa lanta un sorto di koperativa kaminda e shofùr ta bai trabou mainta, ta yega i kue su bus bai kore.
Na momentu ku e shofùr di bùs kumpli 65 aña di edat, e mester bai kas, pero e tin e garantia alabes ku e ta risibí un penshun.
Lo bai traha mas fuerte riba e orario ku bùsnan ta kore. Nos sistema di transporte públiko mester bira un kos ku ta konfiabel.
Diputado Anthony Godett a rekonosé, ku posiblemente lo tin resistensia kontra e plannan aki, pero ku gobièrnu no tin otro rekurso: e sistema manera e ta awor aki, simplemente no por sigui mas, el a agregá finalmente.