WILLEMSTAD – “Koperashon mester bin di tur dos banda. Koperashon ta un tráfiko di dos direkshon”, asina sekretario di estado enkargá ku asuntunan fiskal Alex Rosaria a bisa, relashoná ku e último desaroyonan riba tereno fiskal.
Resientemente e mandatario tabata na Ulanda kaminda el a papia ku representantenan di Union Oropeo. T’asina ku a papia ku representantenan di Komishon Oropeo pa 4 pais oropeo kita nòmber di Antia for di e lista pretu ku ta akusá paisnan di ta evitá pagamentu di belasting den forma adekuá i di ta forma un paraiso fiskal. E paisnan aki ta Polonia, Gresia, Italia i Portugal.
Ketu bai, segun Rosaria ta eksistí e persepshon ku Antia ta konstituí un paraiso fiskal i lo ta kompetí na un manera inhustu kontra otro paisnan ku kua e tin bon relashon. Antia a bin ta bringa fuertemente kontra e impreshon aki pa basta dia kaba. Esei mes ta un dje motibunan di kon Antia ta serando kombenio fiskal ku mas tantu pais na mundu, di akuerdo ku Alex Rosaria.
Hustamente den e mesun kuadro aki, Antia resientemente a sinta ku e pais Emiratonan Arabir Uni pa sera un tratado fiskal. Pero despues di 4 dia na mesa, no a konkluí e deliberashonnan. Segun Rosaria, e sistema ku paisnan arabir ta usa pa un tratado fiskal tòg ta otro for di paisnan oksidental. A palabra ku ta sinta na un di dos okashon, pa asina weta si por haña otro.
Resientemente e parlamentario di frakshon di SP Ronald van Raak a hasi un denunsia den e direkshon aki. Kompanianan grandi ku ta gana hopi plaka na Antia, mester realisá ku nan mester kontribuí na pais. Nan no por sigui gana tur plaka di mundu, miéntras ku situashon sosial na Antia ta motibu di hopi prekupashon, Van Raak, bosero pa Antia di Socialistische Partij a anunsiá. Un ponensia ku e sekretario di Estado a rechasá enérgikamente tambe. El a bisa ku no mester lubidá ku e konsepto paraiso fiskal ta un kos relativo. Pa Merka por ehèmpel, el a bisa, Ulanda ta un paraiso fiskal.
Alex Rosaria a bisa ku e ta konsiderá ku semper Antia tabata duna su koperashon kompleto na paisnan oropeo, ora ta trata di kombatimentu di e tipo di kosnan aki.
“Pero nos a ripará un kos masha pekuliar. Ora ta trata di un akshon ku nan ke tuma kontra Antia, Union Oropeo ta sali dilanti komo un blòki sólido. Awor ku Antia ta aserká e union pa aktua kontra algun pais oropeo ku ta su miembro, ta sugerí Antia pa aserka kada pais individual. E kos aki no ta hustu, e ta hole un midimentu ku dos midí,” segun Rosario a trese dilanti.
El a bisa, ku si nos ta papia di amor i koperashon, anto esei ta tráfiko di tur dos banda, no di un banda so. Komo tal, segun Rosaria, ounke no a papia riba e asuntu aki ofisialmente den seno di gobièrnu ainda, e ta kere ku ta bon pa evaluá e koperashon ku Union Oropeo.
Dentro di poko Rosaria ta spera di manda tur informashon den un dokumento pa Komishon Oropeo pa nan por hasi e esfuerso nesesario pa konvensé e 4 paisnan menshoná pa skrap Antia for di e lista pretu di paisnan ku ta pertenesé na paraisonan fiskal.