WILLEMSTAD – Polis a detené e hóben C.M. di 17 aña di edat, sospechá di ta envolví den un insidente ku a kousa morto di Rayen Malasia. E víktima tabata riba un skuter, ora shofùr di e outo den kua C.M. tabata sintá, a dal den e skuter intenshonalmente. Malasia a muri despues di kasi 3 luna.
E suseso a tuma lugá dia 4 di novèmber 2007. E anochi ei tabatin un problema entre dos grupo di hóben, na altura di e establesimentu Dupont na Sta. Maria. Dado momentu e víktima i un otro hóben a subi un skuter i bai for di e sitio. Na altura di Alivio pa Pueblo riba Rooseveltweg, shofùr di un vehíkulo a dal den e parti patras di e skuter riba kua e víktima tabata. Despues di e choke e shofùr a sigui kore ku e skuter pegá bou di e outo. Segun informashon ku polis a risibí, e shofùr di e outo tabata pertenesé na e grupo di hóben ku tabatin problema ku e grupo di e víktima Malasia algun ratu promé. E víktima Malasia a muri dia 31 di yanüari di e aña akí. Komo ku el a muri despues di 30 dia ku e aksidente a tuma lugá, no a registr’é komo morto di tráfiko. Esaki ta un regla internashonal.
Polis a kuminsá investigá e kaso for di momentu ku e aksidente a tuma lugá, pero no a logra na detené niun sospechoso. Tin indikashon ku e outo ku tabata envolví lo tabata na un garashi i ku polis a haña sa esaki. A base di e informashon akí polis a sigui investigá i a yega na e sospechoso C.M. Na momentu ku polis a deten’é, e tabata na skol.