Kuantu hende muhé mas?
Kuantu hende muhé mas mester keda desabilitá òf mester pèrdè nan bida pa nos konsiensia komun lanta den komunidat ku algu mester pasa pa loke ta paramentu di abusunan doméstiko kontra di hende muhé?
Òf mester sigui skohe pa keda ketu, tur hende kómplise, hungando santu, miéntras ku hende muhénan individual ta sufri, turesten ku nan yunan ta keda mal programá ku ehèmpel di kon no mester atendé ku otro den bida.

E kasonan di abusu kontra di hende muhé ku ta bira konosí no ta mashá. Simplemente pasobra e hende muhé víktima sin ku e sa mes, lo ta sostené e hòmber ku ta humiliá, ofendé i maltrat’é, den un esfuerso straño pa no pèrdè kara.
No mester di sikiater pa bin splika ku e hende hòmber ku ta maltratá un hende muhé, sea físikamente, emoshonalmente òf mentalmente ta un abusadó!
Ku e ta un hende ku mester di tratamentu. I ku e ta hasiendo algu di kua ku e sa ku no por, ku ta un akto kriminal, kastigabel.
E sa, pasobra ta e ta rabia ora ku e hende muhé buska yudansa ku e meresé.
Un hòmber abusadó a skohe pa defendé su mes papiando malu di su kasá ku e mes ta víktimisá. El a kana konta masha hopi kos di e hende muhé. ‘Ku ta paso su kasá no ta trat’é bon’, ‘ku su kasá no sa kon trata é, ku ta su esposo’. I ku e hende muhé ta faya so. Turesten e hòmber abusadó no ta konta niun hende ku su kasá, mester traha pasobra e, hòmber abusadó, no tin sufisiente entrada pa kria su famia. Tampoko e ta konta ku el a kuminsá un relashon pafó di su matrimonio ku un otro hende muhé, kende na e momentu aki ta sperando un yu di dje.

Por bisa loke tur hende ke, pero no por kita e impreshon ku e hòmber aki su komportashon abusadó kontra di e hende muhé ku el a skohe pa kasa kuné, lo ta fuertemente influensiá pa e echo ku el a kibra e promesa ku e mes a hasi i awor no sa kon sali for di e situashon. I awor e ta trata na buska argumento ku su komportashon insultante di abuzu kontra mama di su yunan, den bista di su yunan.
Turesten e kasá ta visiblemente tur na sla ku herida ku ta indiká ku e no a defendé su mes sufisientemente bon kontra di e hòmber abusadó kende su kabes no ta bon i ku ta kometé aktonan kriminal kontra di un otro siudadano.

Lamentablemente ku nos mester a eksperensiá ku den kasonan asina aki no tin sosten adekuá i korekto pa e hende muhé aki na Kòrsou. Unda ta bai skonde e i su yunan na Kòrsou? Kiko tin di hasi ku tur hende ku ta husga e hende muhé i laga e hende hòmber liber, pasobra tòg e hende muhé víktima ta hasi duru i ta kana ainda riba su dos pianan?
Esaki ta bon ehèmpel di misoginia.

Ban serio shonnan.
Nos ta sintá ku un problema real, kaminda kedando ketu nos tur ta kómplise di hòmbernan abusadó ku ta disidí ku nan yunan no tin balor i ku ta bon pa laga muchanan lanta den tristesa i frustrashon. Pasobra si e mama ku ta esun ku ta kria e yunan no ta bon, stabil i trankil, anto ta imposibel pa e por eduká niun yu na drechi.

I atrobe ta tambe tristu pa bisa, ku no tin sosten korekto pa un hende muhé ku ta den desesperashon pa haña yudansa urgente pa skapa su bida i bida i mente di su yunan.
Kasi un hende por kuminsá kere ku niun hende no tin kunes.
Pasobra ora sa, ku seguridat, ku un hòmber na Kòrsou ta buskando pa loko su kasá ku a bai skonde despues di a haña basta sla, no por kere ku e ta hasi esaki na bon, pero mas bien pa kaba di baha su rabia riba un hende ku e komo kasá no ta respetá. I esaki ta keda konfirmá ora ku e abusadó ta demostrá ku e no ke tende ni sa di niun hende, pasobra “ta trata asuntu di e i su muhé”.
Kuantu hende muhé mas mester bira desabilitá (riba gastu di salú públiko di Pais) òf muri, pa esnan konserní tuma akshon?

Bon siman i chèk mi blòg na www.notabel.com.
Por komuniká ku Reyna Joe na info@notabel.com.