E problema medio ambiental ta un problema nacional
Awe Dia Internacional di Medio Ambiente

ORANJESTAD- Awe dia 5 Juni 2008, Dia International di Medio Ambiente comite “Mi Futuro” di Parlamento Hubenil kier pa comunidad para un rato. Kico medio ambiente kiermen pabo? Con importante e ta pabo? Ki influencia abo tin ariba nos medio ambiente y ki influencia medio ambiente tin ariba abo?
Hopi biaha nos no ta mira medio ambiente como un topico cu mester wordo papia mas dor di nos gobernantenan of dor di paisnan grandi manera Merca. Nos tur ta conciente di problemanan medio ambiental rond di mundo.
Nos por papia bon tocante “gobal warming” y con paisnan grandi ta bezig hasi nos mundo mas peor. Pero un pregunta importante nos tur ta lubida, esta: Ami tambe ta contribui na e problema medio ambiental?
Cuanto biaha nos ta core den auto y pasobra nos no por laga sushi den auto nos ta tirele door di bentana? Cuanto biaha nos ta bai beach y pasobra no tin suficiente bari, nos ta laga e sushi djis tira abou? Cuanto biaha nos ta cana cu un hoben, un mucha of cu bo yiu y ela caba cu su juice y ba bise “djis tire abou”.
Pa cuanto tempo mas nos ta bai sigui trata nos Aruba asina. Kico nos ta bezig ta laga tras? E otro generacion tambe lo por desfruta di e beachnan blanco? Nan lo por desfruta di e bunitesa di nos mondinan of nan lo desfruta di mata dorna cu saco di plastiek di tur color?
E problema medio ambiental ta un problema nacional cu cada pais tin cu zorg cu nan ta traha pa mehora. Sigur tin pais cu tin cu traha mas cu otro pero ta keda na cada persona pa zorg cu nan ta duna e topico aki su importancia. Corda e desaroyo di awe ta e Aruba y mundo di mayan.
Awor bo sa di e problema e situation di nos pais , nos Aruba. AWOR KIKO BO TA BAI HASI? Nos tur por yuda nos medio ambiente y e no ta tuma hopi.
E prome stap cuminsa na cas, zorg cu paden y rond di bo cas ta limpi. Ban stop di tira sushi den nos mondi y ban cuida nos beachnan. Esaki ta MI Aruba, BO Aruba, MI FUTURO! Ban cuide!!! Nos TUR ta responsabel.