Skina di Sorti, awe djaweps 5 di yüni di 2008, ta kuminsá ku deseá tur hende un bon dia. Si tabata tin kestion di sigui un sierto filosofia di bida i òf biba un sorto di ideologia, diferente asuntu lo no a yega kaminda nan a yega, esta den un situashon di deskonfiansa i káos. Den nos práktika polítiko, e mayoria no sa mes kiko ta ideologia, ni filosofia i konsekuentemente ta entrega nan mes na “randgebeuren” ku ta stroba prosesonan sosial di desaroyá den un bon direkshon.

Akshon ku base den ideologia i filosofia ta mará na sierto konsistensha, koherensia i lógika. Konosementu i situashon di momentu ta kondusí na sierto tipo di akshon. E mesun tipo di echonan ta kondusí na e mesun akshon (konsistensha). Ora ta trata di hende ku no ta biba un ideologia i no tin un filosofia di bida, sirkunstansia di bida personal kombiná ku su tendensianan natural (struktura di personalidat) ta determiná su akshon.

Si tabata tin bibamentu di ideologia den FOL, lider polítiko di FOL, diputado Anthony Godett lo no ta konfrontando asina tantu problema ku sindikalismo (no ta ku shafer di bus i FKP so). Un partido di tendensia sosialista i fundá riba lucha pa e klase obreril, por diferensia den manera di akshoná pero no por ta den konflikto ku sindikalismo. Ku hende no ta biba un ideologia, e probabilidat di inkonsistensha i koherensia ta abou. Su posishonamentu ta dependé di e situashon personal i spesífikamente di e prioridatnan ku e individuo tin.

Si e tin debe, a drumi bon, ta bou di preshon òf otro faktornan sosio sikológiko e akshon di awe ta diferensiá for di e akshon di ayera. Ta p’esei den nos práktika polítiko, e mesun hendenan ku a akshona den sierto forma un aña pasá, ta papia i aktua diferente riba sierto tipo di kestion. Nan ta karesé di konosementu i kerensha den ideologia i filosofia di bida.

E manera ku FOL a kambia asina drástiko den posishon riba un “issue” manera outonomia tambe tabata indikativo di e ousensia di pensamentu ideológiko. Bo no por kambia bo pensamentu riba solushon di debe di pais, pasobra esaki ta algu ideológiko (den ki direkshon bo ta mira solushon di sierto asuntunan). Pero kaminda práktika polítiko ta parotin, ta kaminda bo por haña puesto pa atendé bo situashon personal ta determiná bo desishon.

Ma ta ripití, ku un analista stratégiko su balor, norma i prinsipionan ta irelevante na momentu di analisá un fenómeno (suseso òf proseso kaminda hende ta envolví). Ta e informashon relevante ku e tin na su disposishon, ku aplikashon di método transparente, ta fòrsa sierto konklushon ku e ta kompartí ku otronan. “The facts point towards conclusions”. Pues opservashon i konklushon ta fòrsa dor di interpretashon metódiko di echonan.

Mi por ta robes den mi pensamentu ku mi tin tur echonan relevante. Pero komo profeshonal mi no ta laga aspektonan sosio sikológiko (ku tin e tendensia di imponé ékis konklushon prematuro) pone ku e aparente rasonamentu ta mas bien un interpretashon di echonan pa akomodá un konklushon ku por ehèmpel pa motibu di afekshon, kerensha òf gana (podisé mester) di kos ta tumá kaba.

Amistat, enemistat, rabia, òf otro estado emoshonal por afektá e proseso di rasoná, pero nan no por kambia e echonan relevante. Pues si bo apliká un método proba, òf den proseso di haña sosten akadémiko, tersera tin di yega na e mesun konklushon. Ku mi apresiashon di echo, por lo general ta resultá asertá, ta sinta den e aplikashon di metodologia i siguimentu di e filosofia sientífiko di laga e echonan hiba mi na konklushon.

Ku serka e mayoria di polítiko tin un falta di konosementu riba materia i base ideológiko ta un echo. Ku no tin debate a base di diferensia den pensamentu ideológiko no ta un sorpresa. Tampoko por ta sorpresa ku tantu bal tili komo tala sinta, pasobra kaminda tin falta di ideologia, “everything goes”. Bo ta yega na un situashon di “one size fits all”.

Pa buena marcha mi ta ripití, ku e filosofia di Socrates, esta di partisipashon mas amplio den e proseso di gobernashon ta base di e sistema demokrátiko i no esun di Plato ku ta bisa ku “the wise must lead and the ignorants should follow”. E persepshon di lokual e mayoria ta deseá, ta mas relevante den un proseso di gobernashon demokrátiko ku e pensamentunan di ken sea. Ta p’esei mi ta analisá i hasi opservashon i ta limitá di ventilá mi posishon personal. Elektorado su bos ta relevante.

Den e sistema di gobernashon demokrátiko kualke mayoria tin derecho di ehersé dominio den tomo di desishon. Kon nan ta usa e poder i kon nan ta yega na desishon i eskoho di akshon ta suheto di evaluashon pa loke ta efektividat, i efisiensia den lus di e metanan ku nan a stipulá. Ku e koalishon i e metanan ku nan pone ta válido den kuadro di ekspreshon elektoral ta relevante si bo ta hiba e filosofia di Socrates. Si bo ta siguidó di Plato, e ekspreshon elektoral ta irelevante.

Si bo no ta sigui nada, e úniko kos ku ta determinante ta e situashon di momentu i bo estado mental. Enbes ku ta sekuensia di prioridat ta akordá kual direkshon di solushon (preferensia ideológiko) ta ser duná, kumbinensia di e aktornan ta determiná ta kiko ta hasi. Punto di salida no ta ni programa di akshon di kampaña, pero e problemanan ku koalishon konfrontando.

Segun mi tempu a pasa ku elektorado ta aseptá tur kos sin mas. Esnan ku ta insultá hende intenshonalmente, i lanta falsu testimonio ku intenshon pa kousa daño personal na kontrinkante polítiko, ta bai topa ku un elektorado inklemente. Den e próksimo elekshon por mira un konsentrashon atrobe di poder polítiko. Influensia inapropia ku tur probabilidat lo keda minimalisá.

Entre tantu Merka su proseso elektoral ta indiká ku mundu lo bai konosé kambionan supstansial. E guera na Irak i Afghanistan lo haña un direkshon diferente. Ami ta ferwagt un redukshon supstansial di medionan finansiero. Un “shift” di medionan finansiero for di guera pa “research and development” lo tradusí su mes den aseleramentu di inovashon teknológiko.

Un dje problemanan ku merikanonan lo mester antisipá mihó riba dje ta e konsekuensia di e troumanan di esnan ku ta regresá for di e gueranan. Merka mester prepará pa e mesun situashon ku a surgi despues ku a para e guera na Vietnam.

Ami ta basta interesá pa mira despues ku Barack Obama kue poder ta kende ta esnan su tras. Ta masha hopi plaka mes e mener aki a logra di ranka pa su kampaña. Kere mi ku lo por bai tin kambionan basta grandi den struktura di poder i influensia na Merka. Keda pendiente pasobra mi ta bai trata di krea un mapa pa por saka algun konklushon.

Skina di Sorti ta ripití ku nos meta ta di fomentá un desaroyo di pensamentu kritiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te otro mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.