WILLEMSTAD – Marbella Felipa lo no konsiderá e reunion general di Sitek di awe nochi komo esun ku e ta deseá pa atendé e funshonamentu di Sitek últimamente. Segun Marbella Felipa den kòmbersashon ku LA PRENSA ta mustra ku mirando riba e funshonamentu den kua tin reklamonan di eks miembro i miembronan ku ta haña ku kosnan no ta kanando bon. Riba esaki a disidí pa manda un karta pa direktiva di Sitek ku e petishon pa un reunion general ekstraordinario di Sitek pa por atendé un ke otro.
Felipa ta sigui mustra ku e no a tuma desishon pa sali for di Sitek, pero pa mas bien buska e forma pa trata e asuntu aki den un reunion plenario. Despues di su karta el a risibí komo kontesta den un forma di reproche ku e mester buska un kantidat di firma pa por tin un reunion di Sitek. I tambe ku direktiva ta mustra ku porfin ku e mes lo asistí na un reunion, di kua no ta alkaso. E karta di Sitek ta bisa ku nan lo bai trata su petishon huntu ku e puntonan di agènda awe nochi loke sigur Marbella Felipa lo no aseptá. E reunion di awe nochi a keda yamá djamars último i ku lo bai tin masha poko miembro presente debí na e forma ku esaki a wòrdu anunsiá.
Marbella Felipa ta dispuesto pa kana i rekolektá firma pa e reunion plenario ku e ta deseá di mira di Sitek pa atendé funshonamentu di e sindikato. For di esaki sigur mester bai na logra e reunion ku mester atendé futuro di Sitek, ya ku tin hopi ta bisa ku e sindikato no ta funshoná manera e tabata den pasado. “Ami mes lo tei awe nochi, apesar ku mi no ta konsiderá e reunion aki komo esun pidí via di e karta entregá na direktiva di Sitek”, segun Marbella Felipa ta duna di konosé.
Finalmente Marbella Felipa ta desmentí ku loke el a hasi tin polítika enbolbí i ku esaki no tin nada di haber ku polítika. Tampoko su intenshon no ta pa faboresé niun interes polítiko den e forma ku el a disidí pa pidi un reunion ekstraordinario di Sitek.