Lorito ta yama tur hende un felis djaweps. Ta masha kos tin di skibi pasobra ta masha kos tin ta pasando!
****
Lorito a bisa bon kla ku medionan mester asumí nan responsabilidat den tempu di krísis. No por t’asina ku un medio ta duna espasio i oportunidat pa instigashon. Aparentemente algun medio no kier komprondé esei i nan ta sigui ku nan aserkamentu di kon ku para keda. Nan ta lubidá ku nan tambe ta parti di un sosiedat i nan tambe ta promové un ansha den nos komunidat!
****
Den e siman aki nos a mira esei un biaha mas. Lorito ta kere firmemente ku un reportero mester sa kon e ta manehá un situashon ku presentá. Bo no por yega pa loko, pone mikrofon i/òf telefòn keriendo ku bo ta hasiendo bo trabou bon. Bo tambe tin ku filtra pasobra fásilmente ta usa bo den e sirkunstansianan aki.
****
Den e situashon di e siman aki tabatin hopi pèrdèdó, poko ganador. Lorito a traha un lista di ámbos. Den e pèrdèdónan tin entre otro: 1. Shofùrnan di bùs mes ku finalmente no a logra masha 2. Aliansa Patriótiko ku a kere un kos pa otro 3. Konsehero Komandante ku no a logra atrobe 4. Muchanan di skol ku a bai hasi eksamen troumatisá 4. Komunidat ku a pasa den dianan di tenshon 5. Diputado Rhuggenaath ku su ekspreshonnan 6. Pasaheronan ku tòg mester bai paga mas tantu 7. Shofùrnan ku no a wèlga i ku mester a kumpra tayer nobo 8. ABC-Busbedrijf ku tambe a sufri daño 9. E señora ku a haña sla na su outo riba Nieuwe Haven 10. Parti di medionan ku a sostené e akshonnan deskabeyá.
****
Den e ganadornan tin 1. Gezaghebber ku a papia ku outoridat 2. Polis ku a aktua ku outoridat i determiná, prinsipalmente Alto Inspektor Cordoba 3. Pòmpnan di gasolin ku a gana enorme plaka ku e anunsio pa hendenan bai tènk 4. E otro parti di medio ku si tabata balansá i krítiko pa loke ta trata e akshonnan 5. Iglesianan ku tabata yen di hende ku ta resa pa kos kaba na bon.
****
Lorito ta bisa semper ku loke bo hasi ku hende, un dia lo alkansá bo mes. Mira un hende ku a ataká tur hende (drechi), papia un seri di soketada di hende i gremio sin ku e hende i gremionan aki por a defendé nan mes, ata awor e mes ta na OM ta duna keho di menasa. Mundu sa bòltu riba su kabes. Esei nos tabata sa kaba pero di e forma aki si Lorito no a mira! Anto kòrda ku rosea di hopi hende ta un kos masha peligroso!
****
Lorito a tuma komo kustumber pa papia bon di tur hende. Anto si nos no por papia bon di un hende, nos ta sera nos klèp di para. Pero si un hende papia malu di nos, e por tin sigur ku e lo haña. Un kos ku Lorito tin masha miedu di dje ta ku nos no tin miedu! Nos ta prepará si pa kualke eventualidat!
****
Lorito a apstené di duna komentario den e diskushonnan ku a surgi entre BC i Ombudsman. Awor e kaso a haña un dimenshon èkstra ku e anunsio di BC ku e no tin konfiansa mas den Defensor di Pueblo. E kaso ta pinta di bira interesante pasobra finalmente ta Konseho Insular mester tuma un desishon. Nos ta bèt for di awor ku e kos aki lo bai bira algu atrobe entre koalishon i oposishon. Oposishon lo sostené Defensor di Pueblo pero si nan tabata den Gobièrnu, nan lo a tuma posishon kontrali. T’asina e wega ta!
****
Tin masha konhetura ta kiko a pasa ku e sentral na Steenrijk ayera. Lorito ta kontentu ku UTS a anunsiá un investigashon independiente pero nos ta kere ku e mester tuma lugá masha purá tambe pa saka tur spekulashon for di aire! Nos ta keda te aki awe. Pasa un dushi dia i te mañan ku Dios su poder!