WILLEMSTAD – Outoridatnan di Salú Públiko di Antia a anunsiá un prohibishon pa importashon di komestibel ku tin etikètnan ku idioma straño. E etikètnan ku ta splika e produktonan mester ta na papiamentu, ulandes, ingles òf spañó, asina Inspekshon di Salú Públiko a informá awe. Otro etikètnan no ta kumpli ku lei antiano.
Pa basta tempu tin un inkomodidat den komunidat relashoná ku importashon di un gran kantidat di produkto djafó den idioma ku niun hende no ta komprondé. Esei ta konta por sierto no solamente pa komestibel pero tambe pa otro produktonan, manera píldora di vitamina òf pa tene peso abou. Inspekshon di Salú Públiko ta bisa ku e tambe a konstatá ku ta inundá merkado di Antia Hulandes últimamente ku komestibel ku no ta kumpli ku e reglanan preskribí den lei di etikèt.
“Regularmente ta konstatá presensia di produktonan ku nan etikèt ta na un otro idioma for di ulandes, papiamentu, ingles òf spañó, miéntras ku lei ta preskribí ku tur indikashon òf splikashon menshoná riba e etikèt mester ta den un di e idiomanan menshoná. Esaki ta pasobra e konsumidó tin e derecho pa haña tur informashon riba kontenido i uso di e komestibel ku e ta kumpra den un idioma ku e por komprondé”, asina Inspekshon di Salú Públiko ta bisa.
Ta resultá ku den último lunanan kòntròl intensivo di Duana i GGD Kòrsou a kondusí na sakamentu for di merkado di vários komestibel, pa motibu ku nan no tabata kumplí ku loke lei ta stipulá. P’esei ta urgí tur importadó, bendedó i rebendedó pa importá i/òf bende solamente produktonan ku nan etikèt ta skibí na ulandes, papiamentu, ingles i/òf spañó. Esaki por evitá situashon i konsekuensia ménos agradabel ku pèrdida finansiero, asina Inspekshon di Salú Públiko ta bisa.
Den entrevista ku LA PRENSA, Inspektor di Salú Públiko Peter Fontilus a bisa ku den e situashon ku tin awor aki ta konfiská e produktonan, ta traha prosèsverbal pa despues eliminá e produktonan aki. Komo ku ta konfiská e produktonan aki na entrada di pais, por lo general esei no tin konsekuensia direkto pasobra e produkto no a drenta pais. Otro ta na momentu ku drenta ku e produktonan ilegalmente. Den un kaso asina aki e hende ku ta importá e produkto i trese riba merkado por haña un but. Si e no paga e but, e ta haña un kastigu di prizòn, asina Fontilus a bisa.