ORANJESTAD- Diahuebs atardi na Mr. Jazz situa nan Paseo Herencia, Nico Connor a batisa su CD nobo titula “Gospel Affirmations” den un forma sumamente bunita y special y cu ta macra tambe e di 10 CD cu e ta produci.
Durante di un atardi masha ameno den compania di invitadonan, famia, amigonan y prensa, Nico Connor a trese dilanti su ultimo produccion, cual ta un bunita compilacion di varios cancion tradicional cu nos conose na Aruba den e genero di Gospel.
E forma cu e bautismo a tuma lugar tabata hopi special, ya cu Nico a escohe pa pasa e baton over na e generacion nobo di Connor. Nico Connor a aparece for di e balcon como un sorpresa y despues cu e la hasi su presentacion e la tira e sticksnan abao na unda cu su sobrinonan morocho, Quincy y Wesley Connor a catch nan y a cuminsa toca ariba steelpan di Nico.
Hopi emocionante y cu un significado hopi importante tabata e forma symbolico aki di e bautismo nobo di Nico Connor. Na su lugar e ta trata di un CD di Gospel. Despues Nico a baha for di e balcon y a topa su sobrinonan ariba escenario. Nan tur a uni hunto den un cancion y asina a marca historia y a asegura cu e tradicion Connor ariba steelpan lo continua pa hopi generacion mas.
E presentacion musical a ser acompaña pa Michael Odor ariba piano, Ivan Quandus ariba bass guitar y Eugene Jones ariba drumset, kende ta ruman di Nico.
Nico Connor a hasi un dedicacion special den su CD nobo cu ta bisa lo siguiente: “This album is dedicated to the Lord God Almighty who blessed me with my musical talent. A special honor to my grandfather, Pastor E.V. Connor, who shared with us that when you follow in the path of the father, you learn to walk like Him.”
Tambe el a rindi honor tambe na dos persona, Sra. Inaria Daal y Sonja Broadbelt, kendenan semper a yude cu benta di su CDnan.
Nico Connor a cuminsa toca instrumento musical for di su 4 aña bieuw. Su prome instrumento tabata violin. El a dura menos di un luna ariba esaki, cual por cierto ta su propio mama tabata maestra.
Su mama, Gloria Thomas Connor, ta un maestra clasico di piano. Despues su mama a tire riba piano y esaki e la toca te cu su 10 aña di edad.
Durante e mesun periodo aki, for di su 5 te cu 10 aña, Nico tabata toca steel pan tambe cu su tata, e famoso y fayecido Edgar Connor “Aruba’s steel pan pioneer.”
Ora cu Nico tabata tin 10 aña bieuw e la bai Hulanda pa biba cu su famia y akinan e la join algun di e tocadornan di steel pan di e grupo di su tata. Nan a tour Europa y Nico a hasi esaki te cu su 23 aña. Debi na e hecho cu e por a toca steel pan asina bon na e edad di 10 aña, e la bira un atraccion principal di e grupo durante di e tournan rond Europa. Mientras tanto, Nico a atende tambe scol di musica na unda e la toca bass guitar.
Pues toca steelpan tabata algo natural pa Nico. E la graba y produci un total di 9 CD caba durante su carera musical y cu esaki e la yega 10 CD. E biaha aki den su mesun palabranan e la bisa cu e la dedica e CD aki na “Many Religion but only one God.”