WILLEMSTAD - Den kaso ku Gobièrnu aktua kontra direktornan general i finansiero di Fundashon Kas Popular, esaki lo nifiká un alivio pa e klientenan di Fundashon Kas Popular. Asina diputado Godett a deklará, ora ku el a referí na e partisipashon ku el a hasi Arthur Con, direktor general di Fundashon Kas Popular, ku e no tin konfiansa mas den su manera di manehá Fundashon Kas Popular.
Segun Godett si hasi un sondeo entre klientenan di FKP, por konkluí ku mayoria kliente ku akudí na FKP, su asuntu nó ta wòrdu solushoná pasobra e gerensia aktual no ta tuma e desishonnan nesesario pa kosnan kana korektamente den e empresa.
Tambe e diputado enkargá ku FKP a bisa ku e ta pendiente di regreso di Henry Jourdain for di eksterior, pa e tambe haña e mesun partisipashon ku señor Con.
Godett a papia kaba ku SEBI, ku ta e sindikato ku ta representá trahadónan di FKP.
Entretantu e diputado a risibí por eskrito, kontesta riba preguntanan ku el a hasi direktor Arthur Con i riba asuntunan interno di FKP. Godett a bisa di no ke adelantá riba e siguiente pasonan ku direktiva ta bai tuma kontra Con i Jourdain. “Pero e situashon a base di e maneho di FKP ta laga hopi di deseá”, e diputado a remarká.
Awor ku Gobièrnu a pèrdè konfiansa den e direktornan, el a enkargá un abogado ku investigashon di e aspektonan hurídiko. Diputado Godett a splika ku na su debido tempu, lo bira konosí kua desishon direktiva di FKP ta tuma.
Maneho defisiente
Komo ehèmpel di e mal maneho di e direktornan di FKP, diputado a menshoná e hecho ku kasnan nò ta wòrdu konstruí. Den kaso mes ku nan wòrdu konstruí, den ehekushon di e proyekto, e kompania enkargá ku e konstrukshon ta wòrdu enfrentá ku problema finansiero. Ku konsekuensia ku e proyekto ta para. Di e forma aki, segun Godett, e direktiva ta wòrdu poné responsabel pa e partinan finansiero ku FKP ta invertí den e proyektonan aki.
Mas aleu, Godett a menshoná ku na Johan van Walbeeck Plein, for di dia 6 di desèmber 2007, mester a kaba ku konstrukshon di 14 kas. Aworakí, seis luna mas lat, e kasnan ta den mesun situashon ku na desèmber 2007. Awor ta un otro kompania mester kaba e trabou, loke ta nifiká ku Fundashon Kas Popular mester saka mas tantu plaka for di su presupuesto, pa kaba un trabou ku a wòrdu inisiá dor di un otro kontratista.
Un lokalidat na unda ku a surgi problema ku proyektonan di FKP, ta Domi Abou, Rooi Santu, un proyekto na Arubastraat. Aki tambe, segun Godett, despues di ún aña e proyekto a kosta 1 mion florin èkstra. “Tin kosnan fuera di òrdu ta tumando lugá i tin kosnan ku ta rekerí desishonnan ku ta wòrdu tumá dor di direktiva di FKP, ku nó ta wòrdu ehekutá”. Pa loke ta trata e biahe di direktor finansiero, Henry Jourdain, den kompania di un kolaboradó di FKP, ku no ta den servisio di FKP, ni su salario no a wòrdu aprobá dor di direktiva di Fundashon Kas Popular, segun Godett, direktiva ta bai asumí su responsabilidat ku e meta pa pone un fin na e falta di rèspèt i faltamentu di reglanan di Fundashon Kas Popular.