WILLEMSTAD, - Servisio di Obra Públiko ta bai kuminsá pronto ku e di dos fase di drechamentu di Schottegatweg Noord. Ta trata di e área di Schottegatweg ku ta kore for di Warda di Polis na Rio Canario te na altura di Puerto Ricoweg. E trabounan ta kuminsá – si no bin nada imprevisto – e próksimo siman di yüni.
Manera boso sa kaba, e promé fase ta tras di lomba. E promé fase a kubri e área entre Gosieweg te na entrada di Suffisantweg i aworakí ta práktikamente kla.
“Eksperensia di promé fase a siña nos ku e fundeshi riba e trayekto aki – esta e promé fase – ta bon. Esei ta nifiká ku den e di dos fase, lo no ta nesesario tampoko pa koba i saka e fundeshi bieu. Loke e kaminda aki lo haña ta e asina yamá “binder” i e kapa final di asfalt. Un bentaha ta e ora ei, ku e trabounan lo dura ménos.
Esei ta e kaminda mes. Pero banda di esaki, lo pone atenshon na e parti di alsera. Riba e alsera mei-mei lo planta palu miéntras lo pone klenku na e alsera na banda.
Unabes trahando riba e trayekto aki, lo probechá kambia i drecha iluminashon di kaya. Unabes ku esaki ta kla, e ta bai keda un beyesa kompleto. Den kuadro di e di dos fase, lo drecha tambe e krusada kompleto na e lusnan di tráfiko na Rio Canario, ke men, tantu e baan nort komo e baan sùit.
Pa por ehekutá e trabounan aki manera boso tur por komprondé, lo tin ku adaptá tráfiko.
Básikamente lo apliká e mesun prinsipio di e promé fase. Lo kita un parti di e vangreil i tráfiko lo pasa parsialmente riba e baan sùit.
Meskos ku esei tabata e kaso den e promé fase, lo indiká tur kambio debidamente ku bòrchi di indikashon i bòrchi tráfiko.
Un kos ku mi por bisa for di awor – esei, pa trankilisá tur hende eibanda – ku e lado di Schottegatweg kaminda tin e diferente negoshinan (manera De Fles, etc) lo keda alkansabel mediante un kaminda improvisá.
Mi ke probechá si di e okashon mesora pa pidi koperashon di henter komunidat atrobe, partikularmente esnan ku ta hasi uso regularmente di Schottegatweg pa tene pasenshi den e simannan ku ta bini, ya ku e trabounan aki ta nesesario. Mi ke ekspresá mi gratitut pa e pasenshi ku nos outomobilistanan a demostrá durante ehekushon di e promé fase. Aki-aya tabatin hende ku no tabata masha kontentu, pero nos ta satisfecho ku e reakshon di komunidat. Meskos ku den e promé fase, nos ke pidi pa sigui instrukshon di polis i di e bòrchinan di indikashon ku ta poné riba e ruta aki. E ta na benefisio di nos tur: mañan nos tur por trafiká riba un kaya nèchi i bunita, ku ta hasi bida muchu mas agradabel.
E trabou lo dura 2 luna i lo ta den man di e kontratista MNO Vervat, ántes Koop Tjuchem. E invershon den tantu e promé komo e di dos fase ta di 2.6 mion florin.
Drechamentu di Schottegatweg Noord ta kuadra ku maneho i vishon di e aktual Gobièrnu pa sigui mehorá infrastruktura na Kòrsou.
“Gradualmente nos lo bai drechando kayanan eksistente, nos lo sigui hasi nos máksimo esfuerso pa asfaltá kayanan ku aworakí ta di tera.
Un ehèmpel ta Banda Riba. Algun dia pasá mi tabata ku un bishita di trabou na Seru Machu kaminda a asfaltá un kaya importante ku tabata di tera. Maginábo, 30 aña largu e habitantenan mester a soportá stòf, dia’den, dia’fo. Dos siman pasá mi tabata na Bándabou, e kaminda pa Soto ku a keda konstruí di nobo. O sea ku, nos tin atenshon pa rònt Kòrsou. Tur esaki, komo parti di e vishon di Gobièrnu di Kòrsou pa alsa kalidat di bida di kada siudadano riba e pida baranka aki”, di akuerdo ku diputado di Infrastruktura Anthony Godett.