WILLEMSTAD – Un polis ku hañ’é den un situashon kaminda rápidamente e tin ku tuma un desishon i aktua, no tin hopi tempu pa pensa. Sin embargo e desishon ku e tuma mester ta un bon desishon. Skol di Polis (LPO) tin un programa nobo ku yama Backbone.
Backbone ta simplemente un ‘wesu di lomba hurídiko’ pa e polis ku kaba di subi kaya. E kantidat di regla ku un polis tin ku tene kuenta kuné, ta pone ku difísilmente un polis por sa tur kos hurídikamente pa e por hasi su trabou. Espesialmente si tene na kuenta ku e reglanan akí ta kambia tur aña. “Esaki no ta na Antia so sino tambe na Ulanda i posiblemente tambe na China, Chile òf Zambia”, segun LPO. Tòg na e skol di polis nan no ke pa e polis ta insigur. Segun LPO e polis mester por aktua di un forma sigur. “No pa e poder sino pa por para fuerte riba su pia a base di lei.”
Backbone tin ku kontribuí ku esaki. Backbone ta trein via un sistema moderno riba kòmpiuter, e maneranan pa e polis usa e medionan ku e tin na su disposishon. Ku ehèmpelnan riba felm i kasonan den práktika, ta trein e polis aspirant kon pa tuma desishonnan lihé i bon. Esaki ta nesesario pasó si riba kaya tuma lugá un atrako, e polis no tin tempu pa wak den su buki di lei loke no por i si por. Ora e mira e sospechoso e tin ku drenta akshon mesora. E tin ku detené e sospechoso, listr’é i konfiská pruebanan sin tin ku pensa muchu largu. Tur loke sosodé despues, por buska den buki. ‘Drill & practise’ te ora e polis riba kaya ta sigur di su aktuashon hurídiko.
E skol di polis di Antia huntu ku e akademia di polis ulandes a desaroyá e wesu di lomba hurídiko akí i pronto tur polis aspirant por sigui e treinen di Backbone. E ta kompletamente adaptá na e situashon lokal. Entretantu a tèst e treinennan den klas ku aspirantnan di polis i e reakshonnan ta alentador, segun LPO.