Lorito ta yama tur hende un felis djabièrnè. Nos ta sigui bula, bula i bula anke tin hende ku no ke pa nos bula den nan serkania. E problema ta ku nan no por stroba nos di bula kaminda nan ta. Pa nan hasi esei, nan mester buska ala falsu òf rab’i fli pa nan yega kaminda nos so por yega! Nan a keda lep!
****
Lorito a tende ku e proyekto aya na ta kana masha bon. Nan a bisa ku a hür edifisio pa masha hopi sèn pa luna, a pretendé mil i un kos i awor no por kumpli. Doño di lugá a bin kobra hür pero no tin plaka pa paga. Trahadónan ku a prepará proyekto tambe ke kobra pero pa nan tampoko tin sèn. Awor hasta tin hende a kuminsá bula for di proyekto. Nan a bisa kaba ku nan si no ta sigui traha mas ku hende kaminda nan plaka no ta sigur! Lorito a komprondé ku por lo pronto por wèl lubidá. Lorito ke bisa nan “next time better luck”! Bida no ta fásil!
****
E kos mas prèt ku Lorito a tende e siman aki ta hende ta diskutí riba prensa neutral i ophetivo. Pa bo por diskutí riba e pregunta si prensa ta neutral i ophetivo, bo mes mester ta neutral i ophetivo. Ademas bo mester tin konosementu di kiko bo ta papia. Bo no mester ta kos bruha di tal forma ku Lorito tin impreshon ku bo pianan no ta riba suela. Esaki ta djis algun ingrediente. Tin hende ta gusta hasi nan mes ridíkulo! Anto tin hende ta bai nan tras tambe!
****
Nos amigu Bicho MBA mester wak su kaya masha bon. Nan a bisa ku parse tin un koriente kontra dje ku ta buska moda pa hal’é un banda. Den e grupo tin hendenan ku no kier kaba di realisá ku nan tempu a pasa. E siman aki nan a haña otro derota fulminante. Nan a laga hendenan inosente bai un lucha ku nan no por a gana. Ken a sali pèrdí? Korekto……esun ku a bai lucha!
****
Lorito a haña un yamada for di Ulanda ku a bisa nos ku Doña Zus a gusta e Lorito di djarason masha! Parse ku el a mustra Woutersito tur kos i nan dos a keda hari so. Parse ku Woutersito ta kambiando di opinion i e tambe ke bai Spaña. Ademas, despues di tur krítika ku e ta hañando i su partido ta sigui baha na popularidat, e mester di un sosiegu leu aya.
****
Obama a bai kome ku Hillary pa nan sinkronisá. Lorito ta haña ku Obama mester a yama Hillary bin serka dje pasobra ta Obama a gana. Muchu a keda awor ku ta Hillary ta importante i ku ta Hillary (i Bill) ta determiná agènda di e próksimo presidente. Obama mester wak su kaya bon!
****
Siman ta sera i tin algun hende ku nos no a tende masha di nan e siman aki. Lorito ta spera ku nan ta preparando pa otro siman si nos tende di nan. Lorito ta kontentu ku Dia di Medio Ambiente a haña hopi atenshon. Pa Lorito esei ta importante, pasobra mondinan limpi ta birando skars.
****
Un saludo pa Prof. Kathy ku a impreshoná nos kon e komo merikano a siña papia papiamentu. E kantika ku el a toka riba guitara pa su nietu Greta a dal tur hende. Anto ainda tin hende aki ku no ta kere den nos idioma! Foei! Te mañan ku Dios su poder!